Аліеў узняў азербайджанскі сцяг над сталіцай Нагорнага Карабаху. І ў іншых месцах таксама
Прэзідэнт Азербайджану Ільхам Аліеў 15 кастрычніка ўзняў сцяг сваёй краіны над горадам Ханкендзі, які з армянскай назвай Стэпанакерт быў сталіцай непрызнанай армянскай Нагорна-Карабахскай Рэспублікі. Пра гэта паведамляе азербайджанскае выданне «Азертадж».
Таксама Аліеў узняў азербайджанскія сцягі над горадам Агдэрэ (армянская назва – Мардакерт) і над Сарсангскім вадасховішчам.
19 верасня Азербайджан пачаў «антытэрарыстычную аперацыю» ў Нагорным Карабаху, на наступны дзень улады непрызнанай рэспублікі пагадзіліся раззброіць і расфармаваць сваё войска і зладзіць перамовы з Баку. Пасля гэтага жыхары рэгіёну сталі масава эміграваць у Арменію.
Кіраўнік Нагорна-Карабахскай Рэспублікі Самвэл Шаграманьян 28 верасня пастанавіў зліквідаваць усе «дзяржаўныя ўстановы і арганізацыі». Рэспубліка спыніць сваё існаванне з 1 студзеня 2024 года.
Генеральны пракурор Азербайджану паведаміў, што ўлады краіны абвясцілі ў міжнародны вышук 300 прадстаўнікоў НКР. Паводле апошніх звестак, у рэгіёне засталося толькі некалькі дзясяткаў этнічных армянаў, а тады як больш як 100 тысячаў ўцяклі ў Арменію.
Тым часам дзяржсакратар ЗША Энтані Блінкен у размове з невялікай групай амерыканскіх заканадаўцаў паведаміў, што Азербайджан можа ўварвацца ў Арменію цягам некалькіх тыдняў.
Якуб Хруст belsat.eu
