Вярхоўны прадстаўнік Еўразвязу ў вонкавых справах і палітыцы бяспекі Жузэп Бурэль пракаментаваў новую хвалю ператрусаў і затрыманняў іншадумцаў у Беларусі.
У ЕЗ называюць дзеянні спецслужбаў Беларусі «шырокамаштабнай атакай на незалежныя галасы». Як адзначаецца ў заяве, новая хваля рэпрэсіяў у Беларусі з’яўляецца «яшчэ адным доказам таго, што рэжым Лукашэнкі вядзе сістэматычную і добра спланаваную кампанію з мэтай прымусіць замаўчаць усе дысідэнцкія галасы і здушыць грамадзянскую прастору».
«ЕЗ заклікае ўлады Беларусі прытрымлівацца міжнародных абавязкаў краіны ў справе выканання правоў чалавека і асноўных свабодаў. Мы патрабуем неадкладнага вызвалення затрыманых праваабаронцаў, а таксама іншых палітвязняў, колькасць якіх пастаянна расце і цяпер складае больш за 550 чалавек. Рэжым павінен спыніць рэпрэсіі і прыцягнуць вінаватых да адказнасці», – падкрэслівае Бурэль.
У заяве адзначаецца, што грубыя парушэнні правоў чалавека і асноўных свабодаў «маюць сваю цану»:
«ЕЗ гатовы разгледзець далейшыя абмежавальныя меры ў адпаведнасці са сваім паступовым падыходам. ЕЗ працягне рабіць усё неабходнае для падтрымання народу Беларусі. Мы будзем працягваць падтрымліваць усіх праваабаронцаў, незалежныя галасы і ўсіх прыгнечаных у Беларусі».
ІІ belsat.eu
