Затрыманы беларускамоўны пластычны хірург Аляксей Дужы. Да яго не пускаюць абаронцаў. Пра гэта паведамляе супольнасць «Белыя халаты».
15 лютага стала вядома, што яшчэ на мінулым тыдні сілавікі затрымалі беларускамоўнага пластычнага хірурга Аляксея Дужага. Затрыманне адбылося проста ў паліклініцы, на працоўным месцы. Вядома, што Дужага трымаюць на Акрэсціна, адвакатаў да яго не дапускаюць. Яго ўжо затрымлівалі ў 2020 годзе.
Паводле «Белых халатаў», на мінулым тыдні прайшоў рэйд па ўстановах аховы здароўя ў Беларусі, падчас якога медыкаў амаль што выкрадалі з працоўных месцаў і потым патрабавалі выкупы за вызваленне. Супольнасць не называла тады прозвішчаў і ўстановаў «з меркаванняў бяспекі», аднак з’ява «была масавай, закранула сталіцу і рэгіёны».
Супольнасць таксама паведамляе, што «тарыфы» за вызваленне пачынаюцца ад $ 500, а канчатковая сума складаецца з некалькіх частак: памер «хабару», які быццам бы інкрымінуюць лекару, памнажаюць на 10, звыш таго патрабуюць 25 тысячаў рублёў «на судовыя выдаткі» і 600 базавых велічынь штрафу.
Не вядома, ці адносіцца затрыманне Дужага да згаданага «рэйду».
Антон Тачняк belsat.eu