Тры памежныя з Еўрапейскім Звязам вобласці Беларусі сінхронна вырашылі аднавіць мясцовы збор за перасячэнне мяжы на аўтамабілях праз устаноўленыя пункты пропуску. Збор пачне дзейнічаць з 1 лютага на тэрмін да 1 студзеня 2025 года.
Адпаведныя рашэнні Берасцейскага, Віцебскага і Гарадзенскага абласных саветаў дэпутатаў былі прынятыя 29 і 30 снежня і апублікаваныя на Нацыянальным прававым партале 12 і 13 студзеня.
Такі збор ужо быў уведзены ў чэрвені 2021 года, але з пачатку 2023-га папярэдняе рашэнне спыніла дзеянне. Цяпер жа дэпутаты ўстанавілі збор на тэрмін да пачатку 2025 года. Плаціць яго трэба з 1 лютага, то бок, у студзені выехаць у Польшчу, Латвію і Літву можна бясплатна.
Аплата праводзіцца за адзін транспартны сродак, які мае не менш як чатыры колы і масу да пяці тон, незалежна ад колькасці пасажыраў. Плацельшчык збору – кіроўца.
Ад выплаты збору ў вызваляюцца транспартныя сродкі, на якіх ідуць:
- асобы, якія выязджаюць пасля пахавання ў Беларусі блізкіх сваякоў, пры наяўнасці дакументаў;
- замежныя грамадзяне, якія лекаваліся ў беларускіх санаторыях;
- замежнікі з цяжкай фізічнай інваліднасцю;
- дэпартаваныя асобы;
- гледачы «Славянскага базару ў Віцебску»;
- грамадзяне Беларусь, якія едуць лекавацца за мяжу пры наяўнасці адпаведнага накіравання.
Стаўка збору надалей складае адну базавую велічыню. Але зараз гэта ўжо не 32, а 37 рублёў.
Якуб Хруст belsat.eu
