Контрнаступ украінскага войска можа пачацца ўжо гэтым летам, заявіў прэм’ер-міністр Украіны Дзяніс Шмыгаль у інтэрвʼю выданню «The Hill». Паводле ягоных словаў, выцек сакрэтнай інфармацыі Пэнтагону не перашкодзіць Украіне вызваліць свае тэрыторыі.
Мы не адчуваем ціску з боку нашых сяброў і партнёраў адносна пачатку наступу. Усе нашыя сябры і партнёры дакладна разумеюць, што для таго, каб перайсці ў контрнаступ, трэба быць на сто і нават болей адсоткаў гатовымі да гэтага, – сказаў Дзяніс Шмыгаль.
На пытанне журналіста пра тое, як апошнія выцекі амерыканскіх сакрэтных дакументаў паўплываюць на планаванне контрнаступу, Шмыгаль заявіў, што Украіна ў любым выпадку вызваліць свае тэрыторыі.
«Мы шмат разоў даказвалі, што можам гэта зрабіць. У нашых партнёраў па ўсім свеце мы просім […] танкі, боепрыпасы, самалёты і бранятэхніку», – заявіў ён.
Нагадаем, што сярод сакрэтных дакументаў Пэнтагону, якія трапілі ў сеціва пры нявысветленых абставінах, змяшчалася ў тым ліку інфармацыя пра планы Украіны наконт вайны, а таксама звесткі, што ў краіне дзейнічаюць сілы спецыяльнага прызначэння некалькіх краінаў NATO. У самім Пэнтагоне ніяк не каментавалі змесціва «злітых» дакументаў.
Алена Рувіна belsat.eu
