Расея і Беларусь пашырылі магчымасці экспарту беларускіх нафтапрадуктаў праз усе расейскія марскія парты. Такое рашэнне прыняў урад Расеі 9 чэрвеня.
Змены, унесеныя ў пагадненне аб арганізацыі супрацы ў галіне перавозу і перавалкі беларускіх нафтапрадуктаў, прызначаных на экспарт у трэція краіны праз марскія парты РФ, прадугледжваюць зняцце абмежаванняў на экспарт праз усе расейскія парты. Такім чынам, пашыраецца геаграфія магчымасцяў для перавалкі беларускіх нафтапрадуктаў у расейскіх партах.
У новай рэдакцыі дакументу з тэксту выключаныя словы «Паўночна-Заходняга рэгіёну». Адпаведнае распараджэнне падпісаў старшыня ўраду РФ Міхаіл Мішусцін.
У межах дамоўленасцяў меркавалі, што ў 2021–2023 гадах Беларусь экспартуе праз расейскія парты 9,836 мільёна тон нафтапрадуктаў. Таксама ў дакуменце прапісана, што калі беларускі бок адгружае аб’ёмы, ніжэйшыя за ўзгодненыя, ён усё роўна абавязаны аплаціць усе ўзгодненыя аб’ёмы перавалкі.
Алена Рувіна belsat.eu