Аляксандр Лукашэнка ўзнагародзіў першую беларускую касманаўтку Марыну Васілеўскую, якая сёння вярнулася ў Менск.
Аляксандр Лукашэнка ўручыў Марыне Васілеўскай медаль Героя Беларусі, а таксама пасведчанне касманаўта.
33-гадовая Марына Васілеўская стала другой жанчынай у гісторыі, якая атрымала званне Героя Беларусі. У 2014 годзе Героям Беларусі стала біятланістка Дар’я Домрачава. Увогуле за часы незалежнасці толькі 13 асобаў (Васілеўская – 14-я) былі ўшанаваныя гэтай узнагародай, прычым чацвёра з іх пасмяротна.
Падчас урачыстай цырымоніі Лукашэнка заявіў, што ў апошнія тыдні ўся Беларусь нібыта жыла пад лозунгам «Космас наш!» Паводле яго, палёт Васілеўскай – гэта новы ўзровень удзелу ў касмічных праграмах і новы ўзровень саюзных стасункаў з Расеяй.
Лукашэнка таксама ўзнагародзіў іншых асобаў, што мелі дачыненне да касмічнай місіі. Ордэнам Пашаны ўзнагароджаны старшыня прэзідыума Акадэміі навук Уладзімір Гусакоў, медалём «За працоўныя заслугі» – генеральны дырэктар авіякампаніі «Белавія» Ігар Чаргінец. Касманаўту Анастасіі Ленкавай і намесніку начальніка ўпраўлення аэракасмічнай дзейнасці НАН Беларусі Івану Бучу была абвешчана падзяка.
Глеб Нержын belsat.eu
