Вайскова-паветраныя сілы ЗША на загад амерыканскага прэзідэнта Джо Байдэна збілі невядомы лятальны апарат ля берагоў Аляскі. Пра гэта паведамілі 10 лютага падчас брыфінгу ў Белым доме, піша ВВС.
Амерыканскія знішчальнікі збілі аб’ект памерам з невялікі аўтамабіль, што ляцеў на вышыні каля 12 тысяч метраў і ствараў пагрозу бяспецы грамадзянскіх палётаў. Ён праляцеў праз Аляску з хуткасцю 64 км/г і рухаўся над морам у бок Паўночнага полюсу, калі быў збіты. Каму ён належаў, невядома.
Абʼект упаў недалёка ад канадскай мяжы на змёрзлы вадаём, яго абломкі плануюць сабраць для вывучэння. Прызначэнне і паходжанне гэтага абʼекта пакуль незразумелыя.
«Мы называем гэта абʼектам, таму што гэта найлепшае апісанне, якое ў нас ёсць цяпер. Мы не ведаем, каму ён належыць», – пракаментавалі ў Белым доме.
Як паведамляе «ABC News», у абʼекта, падобна, не было рухавіка. Ён нібы лунаў у паветры, быў цыліндрычнай формы і меў серабрыста-шэрую афарбоўку.
Гэта адбылося праз тыдзень пасля таго, як амерыканскія вайскоўцы знішчылі кітайскі паветраны шар над тэрытарыяльнымі водамі ЗША. Але прэс-сакратар Пентагону Пэт Райдэр заявіў, што абʼект быў «не падобны ні памерам, ні формай» на кітайскі паветраны шар.
Алена Рувіна belsat.eu
