Расейскі прэм’ер падпісаў пастанову, якая пазбаўляе Беларусь падатковага суверэнітэту
Прэм’ер-міністр Расеі Міхаіл Мішусцін 10 лістапада падпісаў пастанову аб зацвярджэнні наднацыянальнага падатковага камітэту Саюзнай дзяржавы Беларусі і РФ. Пра гэта паведаміў дзяржсакратар Саюзнай дзяржавы Дзмітрый Мезенцаў падчас пасяджэння калегіяў Мінэканамразвіцця Расеі і Мінэканомікі Беларусі ў Берасці, піша ТАСС.
Стварэнне наднацыянальнага падатковага камітэту прадугледжана падпісанай 3 кастрычніка 2022 года дамовай аб агульных прынцыпах падаткаабкладання па ўскосных падатках. Дакумент ліквідуе падатковыя барʼеры ва ўзаемным гандлі, забяспечвае цэласнасць фіскальнай базы бакоў і фармуе адзіную інфармацыйную прастору падатковых органаў. Таксама ён прадугледжвае стварэнне інтэграванай сістэмы адміністравання ўскосных падаткаў, куды будзе ўносіцца інфармацыя аб аперацыях плацельнікаў ПДВ дзвюх краін.
У каментары «Белсату» старэйшы навуковы працаўнік даследчага цэнтру BEROC Дзмітрый Крук адзначыў у 2022 годзе, што ўспрымае гэтую дамову як «продаж па кавалках падатковага суверэнітэту».
«Фактычна ў дачыненні гэтых падаткаў [ПДВ і акцызаў. – Заўвага рэд. Belsat.eu] значная частка падатковай свабоды, магчымасці змяняць і стаўкі, і працэдуры падаткаабкладання так, як краіна палічыць патрэбным, а гэта адна з неадʼемных характарыстык суверэнітэту ў падатковай сферы, губляецца», – заявіў эканаміст.
Тыя элементы падатковага суверэнітэту, якія застануцца ў выніку дамовы ў Беларусі, больш нагадваюць дэкарацыі.
88 % і 880 праграмаў
Тым часам намесніца міністра эканомікі Беларусі Алеся Абраменка паведаміла, што саюзныя праграмы паглыблення інтэграцыі выкананыя на 88 %. Паводле яе, цалкам выкананыя 13 праграмаў. Яшчэ 11 маюць гатовасць высокай ступені. З 993 пунктаў выкананыя 880, паведамілі ў міністэрстве.
Абраменка адзначыла, што ў 2021–2023 гадах асноўны ўпор рабіўся на фармаванне прававога поля для стварэння роўных умоваў гаспадарання, а ў 2024–2026 гадах плануецца перайсці да рэалізацыі супольных праектаў у прамысловасці, сельскай гаспадарцы, ахове здароўя.
Гэтак, у прамысловасці плануецца выпрацаваць агульныя падыходы абароны тэхналагічнага суверэнітэту, наладзіць уласную вытворчасць у прыярытэтных кірунках, развіваць прамысловую кааперацыю. Таксама плануецца спалучыць нацыянальныя інфармацыйныя сістэмы.
Якуб Хруст belsat.eu
