Пасол Беларусі ў Расеі Дзмітрый Крутой паведаміў, што за год доля ЕЗ і Украіны ў вонкавым гандлі нашай краіны абвалілася з 40 % да 5 %. Давялося шукаць новыя рынкі для тавараў і грузаў на $ 10,5 млрд. «Цяпер мы паспяхова развіваемся», – цытуе амбасадара БелТА.
Санкцыі, уведзеныя супраць Менску і Масквы, беларускі пасол Дзмітрый Крутой на форуме прадпрымальнікаў у Хабараўску назваў беспрэцэдэнтнымі:
«Для Беларусі гэта ўвогуле вялікі выклік, таму што 45 % нашай эканомікі апынуліся пад беспасярэднімі санкцыямі, улічваючы вялікі ўзровень вонкавага таваразвароту: наш экспарт і імпарт на 30 % перавышае наш ВУП».
Пасол паведаміў, што давялося шукаць новыя рынкі для тавараў і грузаў на $ 10,5 млрд:
«Да ўсіх гэтых санкцыяў рынкі Заходняй Еўропы і Украіны для нас паводле значнасці займалі 40 %. Сёння яны займаюць 5 %, гэта адбылося фактычна за адзін год. Пераарыентаваць такую плынь тавараў і грузаў (у грошах гэта $ 10,5 млрд) было вельмі і вельмі складана».
Дапамагла Расея, а таксама Кітай, які цяпер другі паводле значнасці гандлёвы партнёр Беларусі.
«Для нас, безумоўна, работа ў Расеі на сёння – абсалютны прыярытэт. З усёй гэтай працы нумар адзін – гэта рэгіянальная супраца», – адзначыў Крутой.
Пасол таксама адказаў «нядобразычліўцам, якія, ухваляючы санкцыі, разлічвалі, што эканомікі Беларусі і Расеі рассыплюцца, будуць нейкія сацыяльныя ўзрушэнні, масавае беспрацоўе ды іншыя негатыўныя эфекты».
«Нічога гэта не адбылося, мы, наадварот, цяпер паспяхова развіваемся і рэалізуем супольныя праграмы імпартазамяшчэння», – запэўніў кіраўнік дыпламатычнага прадстаўніцтва.
Эксперты раз за разам папярэджваюць пра небяспеку залежнасці беларускай эканомікі ад Расеі: любы шок у гэтай краіне абавязкова адаб’ецца на Беларусі. Як прыклад – апошняе падзенне расейскага рубля, услед за якім таннее і беларускі. Як раней адзначаў Леў Львоўскі з даследчага цэнтру BEROC, «расейская эканоміка будзе расці павольней, чымся свет у сярэднім, і, адпаведна, гэтыя нізкія тэмпы росту будуць перадавацца і на Беларусь».
Паводле Белстату, у студзені – ліпені сёлета Беларусь экспартавала тавараў на $ 22,5 млрд, $ 16 млрд з іх – у краіны СНД, у тым ліку ў Расею.
Сяргей Крот belsat.eu