Больш за 700 загінулых і 40 зніклых без вестак – гэта наступствы працяглых абстрэлаў і бамбаванняў Чарнігава расейскай арміяй. Пра гэта распавёў у інтэрвʼю DW мэр Чарнігава Уладзіслаў Атрошэнка. Фотакарэспандэнт «Белсату» наведаў памежны з Беларуссю горад.
Наступствы вайны для Чарнігава ў фотарэпартажы «Белсату».
Мэр Чарнігава ў інтэрвʼю DW распавёў, як горад перажыў актыўную фазу вайны. «Дакладную колькасць ахвяраў, мабыць, мы не высветлім ніколі, бо ёсць вялікая колькасць зніклых без вестак, і мы падазраем, што гэтыя людзі жывымі згарэлі ў месцах прымянення цяжкіх авіябомбаў. У нас ёсць выпадкі, калі муж чакаў жонку, якая павінна была выйсці з лякарні, ён патэлефанаваў ёй і сказаў, што чакае каля дзвярэй. Праз хвіліну на гэтае месца ўпала авіябомба, і гэтага чалавека нідзе не знайшлі, нават парэштак. Мужчына згарэў… Гэта значыць, вельмі высокая тэмпература гэтых авіябомбаў, у радыусе якіх за лічаныя секунды згарае ўсё, што можа згарэць. Мы бачылі гэта і на пашкоджаных аўтамабілях, дзе цалкам выгараюць усе неметалічныя часткі, а застаецца метал рудага колеру з прыкметамі вельмі высокай тэмпературы гарэння. Такіх выпадкаў у нас шмат. Акрамя таго, не ўсіх людзей выцягнулі з-пад завалаў. Таму канчатковыя звесткі будуць пазней з улікам таго, што юрыдычна смерці некаторых людзей мы не зможам даказаць ніколі. Але агульная лічба загінулых у Чарнігаве перавышае 700 чалавек», – сказаў Уладзіслаў Атрошэнка.
Паводле мясцовых уладаў, на аднаўленне гораду спатрэбіцца не менш за тры-чатыры гады.
У ноч на 24 лютага Уладзімір Пуцін абвесціў пачатак вайны (у Расеі яе называюць «спецыяльнай ваеннай аперацыяй») з мэтай «дэнацыфікацыі і дэмілітарызацыі» Украіны. 27 лютага Украіна афіцыйна накіравала пазоў супраць Расеі ў Міжнародны суд ААН. У ім Кіеў просіць прыцягнуць Расею да адказнасці, у тым ліку за скажэнне паняцця «генацыд» дзеля апраўдання агрэсіі супраць Украіны. З пачатку вайны Украіну пакінулі больш за 4,5 млн асобаў.
Масавыя забойствы мірных жыхароў у прадмесцях Кіева заходнія медыі і палітыкі ўжо назвалі генацыдам. Расейскі бок афіцыйна абвяргае сваю датычнасць да забойстваў цывільнага насельніцтва.
Глядзіце таксама:
«Еду да ўнучак, якіх ніколі не бачыў». Рэпартаж з цэнтру для ўцекачоў у польскім Жэшуве
Саша Альтэр belsat.eu
