Кшыштаф Рыбіньскі, які ўзначаліў Еўрапейскі гуманітарны ўніверсітэт у леташнім красавіку, пакідае пасаду рэктара. Адпаведны ліст атрымалі супрацоўнікі і студэнты ВНУ, копію дакументу апублікавала выданне Reform.by. Пошукі новага кіраўніка «пачынаюцца неадкладна», адзначаецца ў паведамленні.
Кшыштаф Рыбіньскі падаў у адстаўку з увагі на здароўе – сваё і чальца ягонай сям’і, паведамляецца ў лісце, падпісаным старшынём Кіроўнай рады ЕГУ Андрусам Кубілюсам і старшынём агульнага сходу суўласнікаў Гортанам Бібі-Сэнтэрам. Апошнім днём працы прафесара будзе 29 лютага.
«З глыбокім шкадаваннем і разуменнем нязменных абставінаў, што прывялі да гэтага нежаданага, але зразумелага рашэння, мы прынялі адстаўку Кшыштафа і неадкладна пачнём працэс пошуку пераемніка».
У лісце таксама адзначаецца, што Рыбіньскі на пасадзе рэктара «забяспечыў універсітэту беспрэцэдэнтную сямігадовую акрэдытацыю», дапамог знайсці грошы на некалькі новых праграмаў.
«Унутраныя рэформы, праведзеныя за ягоны тэрмін, зробяць універсітэт больш моцнай і эфектыўнай установаю».
Асобны ліст студэнтам і калегам разаслаў сам рэктар, піша «Наша ніва». Рыбіньскі ўдакладніў, што апошнім часам удалося істотна павялічыць фінансаванне. Было сабрана €4 млн для мэтавага фонду, €2,5 млн на існыя і новыя праекты.
Рашэнне звольніцца прафесар назваў цяжкім:
«Гэтае рашэнне прынятае пасля доўгіх разважанняў і абумоўленае неабходнасцю засяродзіцца на надзённых праблемах са здароўем – як уласным, гэтак і ў маёй сям’і, – што патрабуюць маёй поўнай увагі».
Кшыштаф Рыбіньскі заняў пасаду рэктара ЕГУ 3 красавіка летась.
Цягам апошніх месяцаў у Еўрапейскім гуманітарным універсітэце адбылося некалькі скандалаў. Дацэнта Сяргея Сялецкага абвінавацілі ў сістэматычным гарасмэнце і булінгу ў дачыненні былых і цяперашніх студэнтак. Выкладчыка ўрэшце звольнілі, але таксама адлічылі студэнтку Таццяну Барысаву, на якую паскардзіўся Сялецкі.
Сцяпан Кубік belsat.eu