8 ліпеня ў Тбілісі мусіў адбыцца Tbilisi Pride Fest, арганізаваны ў падтрымку ЛГБТ-супольнасці. Але на тэрыторыю мерапрыемтства прарваліся некалькі тысячаў прадстаўнікоў правых сілаў, якія ўчынілі пагром. Паліцыя не дала рады затрымаць парушальнікаў.
Так, паводле выдання «Paper Kartuli», прыхільнікі кансерватыўнага руху Alt-Info і іншых правых партыяў Грузіі сабраліся разам і рушылі да месца правядзення Tbilisi Pride Fest. Удзельнікі неслі ў руках іконы, сярод мітынгоўцаў былі святары.
Удзельнікам удалося прарвацца скрозь ачапленне паліцыі, якое было зроблена на шляху маршу, і пасля патрапіць на тэрыторыю фэсту.
Ужо непасрэдна на самой тэрыторыі ўдзельнікі шэсця грамілі сцэну, бар, зрывалі плакаты і партрэты, кралі піва і ваду з крамак, а з парваных ЛГБТ-сцягоў, усталяваных перад сцэнай, а таксама з упрыгожанняў і пабудоў фэста зрабілі касцёр. Пры гэтым, як адзначаюць відавочцы, паліцыя не перашкаджала яго развядзенню.
Пазней частка ўдзельнікаў пагромаў адправілася да будынка парламента Грузіі, а другая засталася на тэрыторыі мерапрыемства, дзе святкавала «перамогу над ЛГБТ-фэстам», танцуючы пад народную грузінскую музыку.
Арганізатары Tbilisi Pride Fest зрабілі заяву на сваёй старонцы ў «Фэйсбуку», аб тым, што падзеі, якія адбыліся 8 ліпеня, указваюць на тое, што «напад быў папярэдне ўзгоднены МУС і радыкальнай групоўкай Alt-Info», бо паліцыя не блакавала дарогу, што вяла да месца правядзення фэсту, і не прымяняла прапарцыйнай сілы супраць тых, хто чыніў напад.
Афіцыйныя асобы краіны таксама адрэагавалі на сітуацыю. Намеснік міністра МУС Аляксандр Дарахвелідзэ адзначыў, што была мабілізавана максімальная колькасць паліцыі, але пратэстоўцаў прыйшло вельмі шмат. Тым не менш паліцыя, паводле ягоных словаў, зрабіла ўсё для «захавання жыцця і здароўя кожнага чалавека», а арганізатараў і ўдзельнікаў мерапрыемства ўдалося вывезці з тэрыторыі фэсту.
Выказалася з гэтай нагоды і прэзідэнтка Грузіі Саламе Зурабішвілі, якая раскрытыкавала МУС і кіроўную партыю, яна заявіла пра тое, што «гарантаваная канстытуцыяй краіны абарона правоў сходаў абазначае правядзенне мерапрыемства, а не эвакуацыю яго ўдзельнікаў».
Раман Шавель belsat.eu
