Святлана Ціханоўская і прадстаўнікі Аб’яднанага пераходнага кабінету сустрэліся з міністрам замежных справаў Польшчы Радославам Сікорскім. Падчас сустрэчы абмяркоўвалася сітуацыя беларусаў у Польшчы і далейшая супраца.
Беларуская лідарка заклікала міністра працягваць выдаваць візы беларусам: як звычайныя, так і гуманітарныя. Ціханоўская адзначыла важнасць захавання мабільнасці беларусаў і прапанавала выдаваць візы не толькі ў Беларусі, але і ў польскіх консульствах у іншых краінах. Ціханоўская прыгадала сітуацыю ў Грузіі, дзе беларусы не могуць атрымаць ніякіх дакументаў.
Бакі дамовіліся запусціць міжведамасную працоўную групу, куды мусяць увайсці прадстаўнікі розных міністэрстваў і дзяржустановаў Польшчы. Гэтая група будзе вырашаць розныя пытанні, звязаныя з Беларуссю.
Святлана Ціханоўская папрасіла міністра падтрымаць беларускі бізнес у Польшчы, у прыватнасці, працягнуць праграму Poland Business Harbour, якая дазваляе ствараць умовы для працы беларускіх кампаніяў. Акрамя таго, лідарка заклікала міністра працягваць дапамогу незалежным беларускім медыям, якія працуюць у Польшчы і адыгрываюць важную ролю ў супрацьдзеянні прапагандзе.
Напрыканцы сустрэчы Святлана Ціханоўская ўзнагародзіла Радослава Сікорскага Крыжам добрасуседства.
Марыя Міхалевіч belsat.eu