У Пакроўскім кафедральным саборы зніклі дзве з васьмі іконаў, што паказвалі новапакутнікаў, забітых у час бальшавіцкага тэрору, паведамляе «Хрысціянская візія».
На зніклых іконах паказаныя ахвяры бальшавіцкага тэрору: закатаваны ў 1918 годзе мітрапаліт Кіеўскі Уладзімір і расстраляны ў 1922-м мітрапаліт Петраградскі Веньямін. У серыі іконаў паказаныя і іншыя ахвяры тэрору, а таксама іхныя кáты: чырвонаармейцы, чэкісты, НКВД.
Пра тое, што серыю іконаў можа прыбраць новы гарадзенскі епіскап Антоній, «Хрысціянская візія» пісала яшчэ ў 2021 годзе. Але абставіны знікнення іконаў невядомыя.
Як расказвае «Hrodna.life», гэтая серыя іконаў з’явілася пасля рэстаўрацыі сабору ў 2006 годзе і з’яўляецца спісамі з іконаў з храма Хрыста Збавіцеля ў Маскве. Супрацоўнікі Камітэту дзяржаўнай бяспекі Беларусі – пераемніка савецкага НКВД – неаднаразова звярталіся да кіраўніцтва царквы з просьбамі прыбраць іконы, што «шкодзяць рэпутацыі» сілавікоў.
Апошнім часам з гэтымі іконамі стала змагацца таксама праўладная актывістка Вольга Бондарава, ды яна ў сацсетках сцвярджае, што не мае дачынення да знікнення іконаў, хоць і цешыцца з гэтага факту.
Алесь Наваборскі belsat.eu
