Нацбанк раскрыў статыстыку куплі-продажы валюты фізічнымі асобамі ў студзені – чэрвені сёлета. За гэты час беларусы здалі 4 млрд 881 млн долараў, а набылі – 4 млрд 558 млн.
Толькі ў чэрвені чысты продаж валюты грамадзянамі – крыху меней за 40 млн долараў. Фізічныя асобы купілі 825,5 млн долараў, а здалі – 865,2 млн.
Агулам за паўгоддзе беларусы купілі валюты на 4 млрд 558 млн, а прадалі – на 4 млрд 881 млн долараў. Розніца – 323 млн долараў.
Сёлета на ўнутраным валютным рынку попыт перавысіў прапанову толькі ў студзені, а ў астатнія месяцы продаж фізічнымі асобамі замежных грошай стала перавышае пакупку.
Раней старэйшы навуковы працаўнік даследчага цэнтру BEROC Дзмітрый Крук тлумачыў «Белсату» гэтую тэндэнцыю тым, што беларусы забіраюць валюту з дэпазітаў і здаюць яе, каб падтрымаць бягучае спажыванне, набыць нерухомасць або інвеставаць у каштоўныя металы.
Таксама эканаміст прагназаваў рост попыту на валюту ў Беларусі, калі патаннее расейскі рубель, а ўслед – і наш. «Калі расейскі рубель пачне прасядаць, то попыт на валюту ў Беларусі можа ўзрасці, бо ў людзей пачнуць падвышацца дэвальвацыйныя чаканні», – казаў Крук месяц таму.
Між тым апошнія два тыдні курс беларускага рубля зніжаўся, і толькі напярэдадні, 7 ліпеня, крыху ўмацаваўся. У канцы чэрвеня долар каштаваў 2,98 рубля, цяпер – 3,076.
Сяргей Крот belsat.eu