«Камісія для вяртання» папярэдзіла беларуса пра крымінальную справу супраць яго
Адбылося чарговае паседжанне «камісіі для вяртання», паведамляе Генеральная пракуратура Беларусі.
Паседжанне правёў генеральны пракурор Рэспублікі Беларусь Андрэй Швед. Былі разгледжаныя некалькі зваротаў. Наконт аднаго з іх было прынятае рашэнне праінфармаваць заяўніка пра ягоны працэсуальны стан у крымінальнай справе.
У іншых выпадках вырашылі паведаміць заяўнікам пра адсутнасць у іхным дачыненні адміністратыўнага ці крымінальнага працэсу на дату іхнага звароту ў камісію.
Агулам, як зазначае Генпракуратура, ад пачатку працы «камісіі для вяртання» ў лютым гэтага года на яе адрас электроннай пошты і ў тэлеграм-бот паступілі больш за 100 зваротаў. Праца камісіі будзе працягвацца.
Камісія для разгляду зваротаў грамадзянаў Беларусі ў пытаннях здзяйснення імі правапарушэнняў («камісія для вяртання») была сфармаваная ў лютым 2023 года. У яе нібыта можа звярнуцца любы беларус, які з’ехаў за мяжу, каб даведацца, ці вядзецца ў ягоным дачыненні ў Беларусі нейкая адміністратыўная ці крымінальная справа, і атрымаць пералік умоваў, пры якіх ён можа вярнуцца дамоў.
Напрыканцы красавіка Генпракуратура паведаміла, што правяла першае паседжанне камісіі.
Паводле «Кіберпартызанаў», станам на сярэдзіну ліпеня ў «камісію для вяртання» звярнуліся ўсяго 16 асобаў. Ухваленыя дагэтуль былі дзве заявы – маці Рамана Пратасевіча Наталлі Пратасевіч і Філіпа Давыдава, які нібыта ўдзельнічаў у пратэстах, а потым з’ехаў у Польшчу.
Марыя Міхалевіч belsat.eu
