У Саудаўскай Аравіі абмеркавалі план заканчэння вайны ва Украіне. У Кіеве перамовы назвалі прадуктыўнымі, піша «Reuters». На саміт прыехаў прадстаўнік Кітаю, і еўрапейскія чыноўнікі з гэтай нагоды кажуць, што «Расея ўсё больш і больш ізалюецца», адзначае газета «Financial Times».
У перамовах у Джыдзе ўзялі ўдзел прадстаўнікі больш за 40 краінаў. Расею на саміт не запрасілі.
Украіна і ейныя саюзнікі назвалі сустрэчу спробаю забяспечыць шырокае міжнароднае падтрыманне прынцыпаў, прапанаваных Кіевам, у тым ліку вывад расейскіх войскаў і вяртанне ўсіх захопленых тэрыторыяў.
Кіраўнік Офісу прэзідэнта Украіны Андрэй Ермак сцвярджае, што «ўсе прысутныя засведчылі адданасць сваіх краінаў прынцыпам Статуту ААН, міжнароднага права і павагі да суверэнітэту і непарушнасці тэрытарыяльнай цэласнасці дзяржаваў».
Паводле яго, кансультацыі аб прынцыпах, на якіх мусіць будавацца справядлівы і трывалы мір, сталіся вельмі прадуктыўнымі.
Пры гэтым намеснік міністра замежных справаў Расеі Сяргей Рабкоў назваў сустрэчу марнай.
Удзел Кітаю, які праігнараваў першы раўнд перамоваў у Капэнгагене, сведчыць аб магчымым зруху ў ягонай пазіцыі, але не аб сур’ёзных зменах, адзначаюць аналітыкі, на якіх спасылаецца «Reuters».
Пры гэтым «Financial Times» піша, што еўрапейскія чыноўнікі назвалі канструктыўнай пазіцыю прадстаўніка Кітаю і адзначылі, што Пекін прадэманстраваў гатовасць і надалей удзельнічаць у міжнародных перамовах аб урэгуляванні ва Украіне. Суразмоўцы выдання кажуць, што адна толькі прысутнасць на саміце Кітаю «паказвае, што Расея ўсё больш і больш ізалюецца».
Сяргей Крот belsat.eu