Золатавалютныя рэзервы Беларусі на 1 ліпеня склалі 7,79 млрд долараў, такія звесткі апублікаваў Нацбанк. Гэта на 80,6 млн долараў менш, чым месяцам раней. ЗВР краіны зніжаюцца трэці месяц запар.
За травень ЗВР упалі на 96,1 млн долараў, а ў красавіку адбылося скарачэнне на 130,4 млн. За студзень ЗВР выраслі на 213,3 млн долараў, за люты ўпалі на 373,3 млн долараў, а за сакавік павялічыліся на 329,1 млн долараў.
Усяго з пачатку 2023 года зніжэнне золатавалютных рэзерваў склала 138 млн долараў, а за мінулы год гэты паказнік знізіўся на 495,5 млн долараў. У 2022 годзе аб’ём ЗВР зніжаўся з пачатку года да верасня, пасля чаго пачаў павялічвацца.
Са жніўня 2022 года Нацбанк публікуе інфармацыю толькі аб абʼёме золатавалютных рэзерваў без дэталізацыі іх структуры, а таксама ўказання фактараў, якія ўплываюць на іх змяненне.
Аднак тлумачэнні дае Еўразійскі банк развіцця. Гэтак, у сакавіку беларускія рэзервы выраслі дзякуючы падаражэнню золата на сусветным рынку (за месяц – на 7,7 %). Акрамя таго, адбілася заўважнае падзенне попыту на валюту на ўнутраным рынку. Таксама дзякуючы кошту золата міжнародныя актывы Беларусі павялічыліся ў студзені, паведамляў раней ЕАБР. А ў лютым яны знізіліся на 373 млн долараў. Тады паўплывала сезоннае павелічэнне попыту на валюту з боку банкаў і юрыдычных асобаў ды падзенне цэнаў на золата.
Паводле прагнозаў уладаў, сёлета золатавалютныя рэзервы мусяць скласці не меней за 6 млрд долараў: да канца 2023 года ЗВР знізяцца на 1,58 млрд долараў.
Алена Рувіна belsat.eu