7 сакавіка на сумесным пасяджэнні Парламенцкай групы Сейму і Сенату Польшчы ў справах Вольнай Беларусі ейным кіраўніком быў абраны дэпутат польскага Сейму Міхал Шчэрба.
Намеснікам кіраўніка парламенцкай групы абраныя сенатар Богдан Барусевіч і віцэ-маршалак Сенату Міхал Каміньскі.
Беларускія дэмакратычныя сілы ўжо дамовіліся аб правядзенні ў бліжэйшы час сустрэчы з новым кіраўніком Парламенцкай групы.
«На нашу думку, важным з’яўляецца акцэнтаванне большай увагі на праблемах, звязаных з масавым парушэннем правоў чалавека ў Беларусі, вызваленнем палітычных зняволеннем, прыцягненнем да адказнасці Лукашэнкі і ягоных памагатых за злачынствы ў дачыненні беларускага і ўкраінскага народаў», – паведаміў прадстаўнік Аб’яднанага пераходнага кабінету Павел Латушка.
Таксама плануецца прапанаваць правесці сумесныя слуханні Сейму і Сенату адносна сітуацыі ў Беларусі і прыняцця адмысловай рэзалюцыі з мэтаю выпрацавання канкрэтных дзеянняў для падтрымання змагання беларускага грамадства і дэмакратычных сілаў Беларусі.
Макар Мыш belsat.eu