Міністр замежных справаў Італіі Антоніа Таяні перакананы, што Еўразвяз павінен сфармаваць уласную аб’яднаную армію для падтрымання міру і перадухілення канфліктаў у рэгіёне, піша Reuters са спасылкай на інтэрв’ю міністра выданню La Stampa.
Паводле Таяні, больш шчыльная еўрапейская супраца ў галіне абароны з’яўляецца прыярытэтам для партыі «Forza Italia», якую ён узначальвае.
«Калі мы хочам быць міратворцамі ў свеце, нам патрэбная еўрапейская армія. І гэта фундаментальная перадумова дзеля таго, каб мець эфектыўную еўрапейскую вонкавую палітыку», – заявіў італьянскі міністр.
Антоніа Таяні перакананы, што Еўразвяз мусіць таксама ўпарадкаваць сваё кіраўніцтва і мець адзінага прэзідэнта замест цяперашняй структуры, прадстаўленай прэзідэнтам Еўрапейскай рады і прэзідэнтам Еўракамісіі.
«У свеце з магутнымі гульцамі, такімі як ЗША, Кітай, Індыя, Расея – з крызісамі ад Блізкага Усходу да Інда-Ціхаакіянскага рэгіёну – італьянскія, нямецкія, французскія ці славенскія грамадзяне могуць быць абароненыя толькі тым, што ўжо існуе, а менавіта Еўразвязам», – дадаў Таяні.
Еўрапейскае абароннае супрацоўніцтва ўвайшло ў палітычны парадак дня пасля поўнамаштабнага ўварвання Расеі ва Украіну амаль два гады таму. Намаганні Еўразвязу былі сканцэнтраваныя на пашырэнні НАТО: Фінляндыя летась далучылася да альянсу, Швецыя таксама на шляху да ўступлення.
Міністр замежных справаў Антоніа Таяні стаў лідарам «Forza Italia» пасля смерці Сільвіё Берлусконі ў 2023 годзе.
Марыя Міхалевіч belsat.eu