Кіберпартызаны заявілі, што атрымалі доступ да сайту і ўнутраных дакументаў беларускага Чырвонага Крыжа, які абвінавачваюць у суўдзеле ў вывазе ўкраінскіх дзяцей з акупаваных тэрыторыяў. Цяпер вэб-старонка арганізацыі недасяжная.
Паводле словаў хакераў, яны атрымалі доступ да дакументаў грамадскага аб’яднання, якія сведчаць аб яго супрацоўніцтве з дзяржструктурамі, а таксама вывазе ўкраінскіх дзяцей з акупаваных тэрыторый Украіны ў Беларусь.
Кіберпартызаны размясцілі на сайце выявы і допісы пра злачынцаў, якія ўдзельнічалі ў вывазе ўкраінскіх дзяцей, падпісвалі сфабрыкаваныя пратаколы на выбарах 2020 года і аказвалі матэрыяльную дапамогу сілавікам.
«Чырвоны Крыж Беларусі падтрымлівае дыктатара Лукашэнку і вайсковага агрэсара РФ», – такі допіс з’явіўся ў раздзеле галоўных навінаў сайту.
Раней кіраўнік Чырвонага Крыжа ў Беларусі Дзмітрый Шаўцоў пагражаў Захаду ядравай зброяй, у ліпені наведаў акупаваныя тэрыторыі Украіны, пры гэтым на ім была форма з Z-сімволікай. Таксама ён сам прызнаваўся ў вывазе ўкраінскіх дзяцей.
Алена Рувіна belsat.eu