Дзяржаўны памежны камітэт Беларусі распавёў, што на беларуска-польскай мяжы памёр грамадзянін Егіпту, які спрабаваў трапіць на тэрыторыю Польшчы, і яго нібыта гвалтоўна выцеснілі адтуль польскія памежнікі.
У тэлеграм-канале беларускага памежнага камітэту апублікаванае відэа, на якім адзін мужчына ляжыць на траве, а другі сядзіць побач з ім. Сцвярджаецца, што раніцай 5 жніўня «польскія сілавікі выцеснілі праз браму для жывёлаў» двух мігрантаў. Адзін з іх – сірыец, другі – егіпцянін.
Іх абодвух нібыта затрымалі на польскім баку мяжы, там збівалі, забралі ў іх рэчы і грошы і «з прымяненнем газавых балончыкаў прымусілі прайсці праз агароджу».
«Некалькі дзясяткаў метраў сірыец здолеў пранесці сябра ў непрытомным стане, аднак мужчына памёр. Беларускія памежнікі, якія прыбылі на месца здарэння, выклікалі брыгаду хуткай дапамогі, якая канстатавала смерць уцекача (егіпцяніна – рэд.). Грамадзяніну Сірыі аказаная неабходная дапамога», – запэўнівае памежны камітэт.
Паводле Памежнай аховы Польшчы, за мінулыя содні на тэрыторыю краіны спрабавалі трапіць без патрэбных дакументаў 43 замежнікі – грамадзяне Марока, Пакістану і Судану. За дапамогу мігрантам затрыманы грамадзянін Украіны, які перавозіў 4 грамадзянаў Афганістану.
Апошнім часам ад Памежнай аховы Польшчы штодня прыходзяць навіны пра групы мігрантаў, якія спрабуюць незаконна перайсці мяжу, а таксама закідваюць памежнікаў камянямі і петардамі. Польшча сцвярджае, што беларускі бок дапамагае мігрантам пераходзіць мяжу і забяспечвае іх камянямі, галлём і т.п. для спробаў гвалтоўнага прарыву праз мяжу.
Марыя Міхалевіч belsat.eu