«Белсат» падводзіць вынікі апошніх содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 5 жніўня чытайце ў нашым аглядзе.
З моманту поўнамаштабнага ўварвання расейскага войска ва Украіну пайшоў 163-і дзень. Паводле звестак Генеральнага штабу ЗСУ, за гэты час страты акупантаў дасягнулі 41 650 чалавек забітымі.
Цягам апошніх содняў на валынскім і палескім кірунках сітуацыя істотна не мянялася. Падраздзяленні Узброеных сілаў РБ ажыццяўляюць узмоцненую ахову беларуска-ўкраінскай мяжы ў Берасцейскай і Гомельскай вобласцях. Таксама адзначаецца, што ў часцях сілаў спецыяльных аперацыяў Беларусі праводзіцца праверка баявой гатовасці.
На сіверскім кірунку расейцы абстралялі цывільную інфраструктуру ў ваколіцах населеных пунктаў Залізны Міст, Гай, Грамяч і Міхальчына Слабада Чарнігаўскай вобласці і Старыкова Сумскай вобласці.
На суседнім харкаўскім кірунку расейскія войскі абстралялі з артылерыі тэрыторыі каля населеных пунктаў Харкаў, Баршчова, Карабочкіна, Вялікія Прыходы, Рускія Цішкі, Стары Салтаў, Прышыб, Цыркуны, Масьпанава і Безрукі.
На славянскім кірунку абстрэлы былі зафіксаваныя каля Багародзічнага, Мазанаўкі, Гусараўкі, Адамаўкі, Курулькі, Храстышча, Сулігаўкі, Даўгенькага і Вялікай Камішувахі.
На краматорскім кірунку былі здзейсненыя абстрэлы ўкраінскіх тэрыторыяў каля Сіверску, Мікалаеўкі, Старадубаўкі, Спірнага, Крывой Лукі, Верхнякаменскага, Грыгораўкі, Серабранкі, Райгарадку і Каленікаў. На суседнім бахмуцкім кірунку расейцы праводзілі штурмавыя і наступальныя дзеянні з мэтаю паляпшэння тактычнага становішча і стварэння спрыяльных умоваў для авалодання Бахмутам і Салядарам.
Акрамя гэтага акупацыйныя сілы абстралялі з артылерыі ваколіцы населеных пунктаў Якаўлеўка, Кодзема, Пакроўскае, Раздолаўка, Вяршына, Бахмут і Салядар. На аўдзееўскім кірунку расейцы праводзяць штурмавыя дзеянні, баі працягваюцца.
Былы міністр абароны «ДНР» Ігар Гіркін (Стралкоў) у сваім тэлеграм-канале паведамляе, што населены пункт Піскі амаль цалкам захоплены расейцамі, а Мар’інка – на дзве трэція.
Таксама былі абстраляныя ваколіцы населеных пунктаў Піскі, Прачыстаўка, Шаўчэнка, Валадзіміраўка, Невельскае, Новабахмутаўка, Няйталава і Краснагораўка.
На навапаўлаўскім і запарожскім кірунках актыўныя баявыя дзеянні не праводзіліся. Расейскія абстрэлы былі зафіксаваныя каля населеных пунктаў Кансцянцінопаль, Залізнічнае, Варвараўка, Урэмаўка, Мар’інка, Гуляйполе, Гуляйпольскае, Малыя Шчарбакі, Цяміраўка і Белагор’е.
На паўднёвабужскім кірунку акупанты засяродзіліся на ўтрыманні занятых пазіцыяў і правядзенні паветранай выведкі з дапамогай беспілотнікаў
Акрамя гэтага яны абстралялі ваколіцы населеных пунктаў Мікалаеў, Луч, Ліманы, Новая Зара, Новамікалаеўка, Кобзарцы, Любаміраўка, Кісялёўка, Андрэеўка, Лазавое, Белагорка, Асакораўка, Пацёмкіна і Зялёны гай.
Таксама расейцы нанеслі ракетны ўдар па інфраструктурным аб’екце ў ваколіцах населенага пункту Мікалаеўка Адэскай вобласці.
Тым часам кіраўніка створанай акупантамі часовай адміністрацыі Херсонскай вобласці Уладзіміра Сальда, імаверна, атруцілі. Учора яго пераправілі з больніцы на Херсоншчыне ў адну з медустановаў Крыму. Сёння Сальду стала горш, яго падключылі да штучнай вентыляцыі лёгкіх і ўвялі ў кому. У такім стане яго пераправяць на лекаванне ў Маскву.
Эксперты амерыканскага Інстытуту вывучэння вайны (ISW) выказалі меркаванне, што Украіна ўпершыню пачала актыўна вызначаць хаду вайны. Цяпер яна захоплівае стратэгічную ініцыятыву і вымушае Расею пераразмяркоўваць сілы і мяняць прыярытэты ў адказ на ўкраінскія контрнаступальныя аперацыі.
У прыватнасці, цяпер расейскія войскі ўсё часцей перакідаюць асабовы склад і тэхніку ў Херсонскую і Запарожскую вобласці на шкоду сваім намаганням у захопе Славянску і Сіверску, ад якіх яны, здаецца, адмовіліся, мяркуюць аналітыкі. Расейскія сілы таксама пераразмяшчаюць ваенную тэхніку ў Крым з іншых частак Украіны.
Раней расейскія сілы ўжо адводзілі або прыпынялі наступальныя аперацыі на Харкаў і паўднёвую вось, каб зрабіць прыярытэтным захоп Луганскай вобласці. Але тады яны рабілі гэта з уласнай ініцыятывы, праз змены прыярытэтаў камандавання.
Кіраўнік Луганскай абласной адміністрацыі Сяргей Гайдай паведаміў пра мабілізацыю на тэрыторыях вобласці, занятых Расеяй. Адзначаецца, што ў шэрагу гарадоў Луганшчыны, што перайшлі пад кантроль Расеі, мясцовым жыхарам раздаюць позвы проста на вуліцах, а на прадпрыемствах патрабуюць спісы працаўнікоў.
Тым часам выданне «Вёрстка» сумесна з фондам «Русь Сидящая» высветліла, што вярбоўшчыкі ад так званай ПВК Вагнэра наведалі як мінімум 17 калоніяў у 10 рэгіёнах Расейскай Федэрацыі. У першую чаргу, рэкруцёры праяўляюць цікавасць да асуджаных па артыкулах аб забойствах і разбоі. У выніку прапановы прыняць удзел у вайне супраць Украіны прынялі больш за тысячу зняволеных. Акрамя таго, на базе адной з установаў, мяркуючы па паведамленнях асуджаных і іх сваякоў, арганізаваны пункт спецыяльнай падрыхтоўкі, дзе тыя, хто пагадзіўся адправіцца на вайну, праходзяць своеасаблівыя вучэнні па 20 гадзін у дзень.
СБУ паведаміла пра затрыманне былога супрацоўніка Мінабароны Украіны, якога падазраюць у дзяржаўнай здрадзе. Мяркуецца, што былы намеснік кіраўніка Галоўнага ўпраўлення выведкі Мінабароны ў званні генерал-маёра перадаваў расейскім спецслужбам інфармацыю з грыфамі «сакрэтна» і «зусім сакрэтна». Яго выкрылі і затрымалі неўзабаве пасля пачатку поўнамаштабнай вайны. Падчас вобшуку на працоўным месцы мужчына спрабаваў забіць з пісталета Макарава супрацоўнікаў следча-аператыўнай групы СБУ.
Міністр інфраструктуры Аляксандр Кубракоў паведаміў, што ранкам 5 жніўня тры судны з украінскім збожжам пакінулі парты і накіраваліся ў бок Стамбулу марскім гуманітарным калідорам. Агулам гэтыя судны маюць на борце больш за 58 тысяч тонаў кукурузы.
BK belsat.eu
