Прадстаўнік Аб’яднанага пераходнага кабінету па замежных справах Валер Кавалеўскі ў эфіры «Белсату» распавёў падрабязнасці свайго візіту ў ЗША.
У сталіцы Злучаных Штатаў Валер Кавалеўскі правёў працоўныя сустрэчы ў міністэрстве абароны ЗША.
У Пентагоне ён меў сустрэчу з намесніцай міністра абароны ЗША Селестай Уолландэр, якая займаецца пытаннямі супрацы ў галіне міжнароднай бяспекі. Паводле Кавалеўскага, амерыканскі бок найперш цікавіўся сітуацыяй у Беларусі з вайскова-палітычнага пункту гледжання.
«Як выглядае размяшчэнне расейскіх войскаў у Беларусі, якія ёсць сцэнары развіцця падзеяў, ці зможа сітуацыя яшчэ больш пагоршыцца», – пералічыў тэмы размовы Кавалеўскі.
Паводле Кавалеўскага, беларускаму боку вельмі важна паразумецца ў пытанні дапамогі ад заходніх краінаў, каб, у выпадку неабходнасці, Аб’яднаны пераходны кабінет меў магчымасць абараніць незалежнасць Беларусі.
«Ваенна-палітычная сітуацыя ў Беларусі на сённяшні дзень павінная турбаваць не толькі беларусаў, але і еўрапейцаў, і амерыканцаў», – заявіў Кавалеўскі.
16 студзеня кіраўніца Аб’яднанага пераходнага кабінету Святлана Ціханоўская плануе ўзяць удзел у Сусветным эканамічным форуме ў Давосе. Паводле Валера Кавалеўскага, на форуме у Давосе будуць абмяркоўваць не толькі эканамічныя тэмы, але і пытанні бяспекі.
«На сустрэчах у Давосе трэба будзе абавязкова прыцягваць увагу да сітуацыі ў Беларусі. Гаворка і пра ўнутранапалітычны крызіс, і пра ўдзел Лукашэнкі ў вайне супраць Украіны. Усё гэта стварае пункты напружання, якія пагражаюць інтарэсам не толькі Беларусі, але і ўсяго рэгіёна», – падсумаваў Кавалеўскі.
Раней Святлана Ціханоўская правяла сустрэчы з міністрамі абароны Канады і Нідэрландаў. Прайшлі таксама сустрэчы ў міністэрстве абароны Нямеччыны.
АА belsat.eu