Эстонія плануе стварыць юрыдычны механізм, каб замарожаныя ў краіне расейскія актывы атрымала Украіна. Пра гэта заявіў міністр замежных справаў Урмас Рэйнсалу, піша выданне Postimees. Гаворка ідзе пра €17 мільярдаў.
Улады Эстоніі пастанавілі стварыць юрыдычны механізм для перадачы Украіне расейскіх актываў на €17 мільярдаў. Міністр замежных справаў Урмас Рэйнсалу канстатаваў, што Еўракамісія пакуль не знайшла кансэнсус, каб канфіскаваць грошы краіны-агрэсара і аддаць іх Кіеву.
«Мы абмеркавалі гэта ва ўрадзе і пастанавілі, што паралельна пачнём стварэнне юрыдычнай структуры, якая дазволіць выкарыстоўваць гэтыя грошы. Для нас важна стварыць прэцэдэнт і дапамагчы іншым краінам выкарыстоўваць яго. Спадзяюся, што Эстонія, прапанаваўшы рашэнне, зможа аказаць ціск на ўсіх, каб яны дзейнічалі хутчэй», — сказаў кіраўнік МЗС.
Ён адзначыў, што праз месяц Талін раскрые падрабязнасці свайго плана.
Пасля пачатку вайны ва Украіне ЕЗ замарозіў расейскія актывы, у тым ліку Цэнтрабанку РФ, на €319 мільярдаў. Еўракамісія з кастрычніка шукае варыянты, як легалізаваць канфіскацыю гэтых грошай і перадаць іх Кіеву ў якасці кампенсацыі шкоды.
Сяргей Крот belsat.eu