А вагнэраўцы прыедуць? Мы патэлефанавалі ў КДБ – і нас не супакоілі, а сказалі слухаць Лукашэнку
У закінутай вайсковай частцы ў вёсцы Цэль нешта задумалі, ставяць сотні намётаў. І Лукашэнка якраз сказаў, што мяцежным баевікам групы Вагнэра прапанавалі адну з закінутых частак. «Белсат» патэлефанаваў у КДБ пад выглядам занепакоенай жыхаркі Цэлі – выйшаў дзіўны дыялог, які наўрад ці дапаможа даць рады са стрэсам ад магчымага прыезду галаварэзаў у літаральным сэнсе гэтага слова.
На тэрыторыі вайсковай часткі ў вёсцы Цэль Асіповіцкага раёну дабудавалі палявы лагер. Магчыма, там размесцяцца баевікі групы Вагнэра, якім расейская ўлада дазволіла «сысці ў Беларусь» і якім радуецца Аляксандр Лукашэнка, што нібыта запрасіў іх.
Праўда, у лагеры на тры сотні намётаў баевікоў пакуль не відаць, як не відаць і іхнага лідара Яўгенія Прыгожына (ёсць хіба што ўскосныя прыкметы: прылятаюць і вяртаюцца назад ягоныя самалёты). Магчыма, лагер будавалі не для вагнэраўцаў, а для нейкіх іншых гасцей, хаця б тых расейскіх вайскоўцаў, якія прыедуць ахоўваць ядравую зброю.
Жыхарка вёскі Цэль, з якой паразмаўляў «Белсат», распавядае: чуткі аб прыездзе вагнэраўцаў былі, «трэску» з гэтай нагоды шмат, але баевікоў яна не бачыла і не ведае, ці прыедуць яны насамрэч.
Дык прыедуць ці не? Мы паспрабавалі спытаць пра гэта ва ўпраўленні Камітэту дзяржаўнай бяспекі Магілёўскай вобласці: журналістка «Белсату» назвалася занепакоенай жыхаркай вёскі Цэль.
Прадстаўнік упраўлення, які прадставіўся неразборлівым мычаннем (адно слова было падобнае на «памочнік»), запатрабаваў перад адказам персанальныя звесткі: імя, прозвішча, месца жыхарства, дату нараджэння, нумар мабільнага тэлефона. Пасля гэтых роспытаў адбыўся наступны дыялог:
– Я сёння бачыла фатаграфіі намётаў, якія стаяць у былой вайсковай частцы, каб спытаць, што наогул адбываецца. Я трохі асцерагаюся выходзіць з дому, таму што шмат усякага чула пра вагнэраўцаў. І вось хачу спытаць, наколькі бяспечна наогул выходзіць з дому.
– А дзе вы гэтыя фатаграфіі бачылі?
– У інтэрнэце.
– Ну, а на якіх крыніцах інфармацыі?
– Я не ведаю: ну мне проста выскачыла вось, я ўбачыла гэта.
– Ну вы ж зразумейце, што ў інтэрнэце могуць пісаць усё што заўгодна. Вы інфармацыю чэрпаеце з афіцыйных крыніц інфармацыі. Не каналаў экстрэмісцкіх, а афіцыйных крыніц. Правераных крыніц.
– Я тэлефанавала ў міліцыю, мне там сказалі, што вам трэба патэлефанаваць.
– У міліцыі сказалі, нам патэлефанаваць трэба?
– Ага.
– Ну вы зразумейце, што такой інфармацыяй я не маю. Дзесьці ў інтэрнэце нешта напісалі. Гэта правераная крыніца інфармацыі? Якога… дзе вы канкрэтна бачылі гэтую публікацыю?
– Я, шчыра кажучы, не ведаю.
– Не ведаеце, дзе?
– Па-мойму, гэта было нейкае расейскае СМІ.
– Але гэта ж можа быць і няпраўдай, разумееце?
– Разумею, але ўсё роўна неяк страшна, разумееце? Баюся вось таму, што ўсякія жудасныя бачыла відэа ў інтэрнэце.
– Паслухайце выступленне кіраўніка дзяржавы нашага ў частцы, якая датычная, яно было нядаўна. Там усё канкрэтна, выразна тлумачыць, растлумачвае: што, чаго, навошта і як. А намёты дзесьці – гэта любое месца можа быць, разумееце?
– Разумею, але вось як вы думаеце, вагнэраўцы – яны будуць у Беларусі?
– Ну я ж кажу, паслухайце выступленні афіцыйныя, якія на афіцыйных інфармацыйных рэсурсах, выступленні вышэйшых службовых асобаў, кіраўніка дзяржавы афіцыйныя ў гэтым пытанні. Ён усё канкрэтна тлумачыць, будуць яны там, не будуць, што, навошта і як.
– А можаце трошкі…
– Больш інфармацыі, яны ўсім валодаюць.
– Так, я разумею, а што там сказаў гэты кіраўнік дзяржавы?
– Ну паслухайце, што ён сказаў! У інтэрнэце забіце «выступ кіраўніка дзяржавы», там што… Усё выразна ён распавядаў, як было і чаму адбываецца так.
Аляксандр Лукашэнка 27 ліпеня сапраўды вельмі падрабязна распавядаў сваю версію падзеяў у Расеі, прадставіў сябе выратавальнікам расейскай дзяржавы, падзякаваў сем’ям беларускіх вайскоўцаў і сказаў міністру абароны, што няма прычынаў баяцца вагнэраўцаў, а трэба пераняць іхны досвед.
Прыгожыну ён завочна прапанаваў «нейкі час у нас перакантавацца і іншае», калі будзе трэба. Лагераў для баевікоў, як казаў Лукашэнка, у Беларусі «мы пакуль не будуем», але «калі яны захочуць, мы іх размесцім», «мы ім прапанавалі адну з закінутых частак, калі ласка, плот ёсць, усё ёсць, стаўце намёты – чым можам, дапаможам». Але гэта, падкрэсліў Лукашэнка, будзе не за грошы беларусаў, а коштам Прыгожына і ягоных баевікоў.
ЛГ, Алесь Наваборскі / АА belsat.eu
