Былы кандыдат на прэзідэнта і кіраўнік БСДГ Сяргей Чэрачэнь атрымаў запрашэнне на Усебеларускі народны сход у якасці госця. Пра гэта палітык паведаміў у сваім Facebook.
«Са словаў арганізатараў, гасцям права голасу не дадзенае», – напісаў Чэрачэнь.
Ён не дадаў, ці прыме гэткую прапанову.
Запрашэнне ў якасці госця атрымаў і кіраўнік Беларускай сацыял-дэмакратычнай партыі «Грамада» Ігар Барысаў, піша «Наша Ніва». Яму тэлефанаваў кіраўнік апарату Савету Міністраў Канстанцін Бурак. Наконт удзелу ва УНС Барысаў будзе раіцца з аднапартыйцамі.
Раней стала вядома, што ўдзел ва УНС можа ўзяць КПРФ. Пра гэта сёння размаўлялі Аляксандр Лукашэнка і кіраўнік расейскіх камуністаў Генадзь Зюганаў. Пры гэтым не вядома, ці зробяцца расейскія камуністы дэлегатамі сходу альбо застануцца гасцямі.
VI Усебеларускі народны сход мае адбыцца ў Менску 11–12 лютага. Удзел у ім возьмуць 2700 дэлегатаў з беларускіх працоўных калектываў і аб’яднанняў.
ЯП, belsat.eu