З рэжысёрам Беларускага дзяржаўнага тэатру лялек Аляксеем Ляляўскім не працягнулі кантракту. Пра гэта піша «Зеркало» са спасылкаю на інфармацыю ад чытачоў.
Ляляўскі яшчэ прапрацуе апошні месяц – ліпень, пасля чаго пакіне пасаду. Ён працаваў у тэатры з 1979 года.
Аляксей Ляляўскі нарадзіўся ў 1957 годзе ў Менску. Ён сын Анатоля Ляляўскага, аднаго з заснавальнікаў Беларускага тэатру лялек. Аляксей працаваў рэжысёрам і памочнікам галоўнага рэжысёра ў літаратурнай частцы Беларускага дзяржаўнага тэатру лялек у Менску, а пасля галоўным рэжысёрам у Магілёўскім тэатры лялек і Беларускім дзяржаўным тэатры лялек. Паставіў больш за 100 спектакляў.
Ляляўскі – заслужаны дзеяч мастацтваў Беларусі, двойчы лаўрэат нацыянальнай тэатральнай прэміі Беларусі, лаўрэат расейскай нацыянальнай тэатральнай прэміі «Залатая маска». У 2009 годзе ўзнагароджаны медалём Францыска Скарыны.
Раней, увосень 2022 года, на пенсію адправілі Яўгена Клімакова, які з 1985-га быў дырэктарам Беларускага дзяржаўнага тэатру лялек.
Алена Рувіна belsat.eu