«Архіпелаг БЕЛАГ» – так назваецца новы падкаст-серыял «Радыё Свабода» пра тое, як арганізаваная карная сістэма рэжыму Лукашэнкі.
Падкаст-серыял будзе мець сем частак, у якіх аўтары раскажуць пра ўсе кругі пекла карнай сістэмы рэжыму Лукашэнкі – затрыманне, «содні», следства, хатнія арышты, «хімію», этапы, калоніі, турмы і жыццё пад наглядам па вызваленні. Дапамагаюць у гэтым аўтарам былыя палітзняволеныя, былыя сілавікі, праваабаронцы, а таксама нобелеўская лаўрэатка Святлана Алексіевіч.
Так, візуалізацыю падкасту журналістам Радыё Свабода дапамагалі рабіць былыя палітзняволеныя – Марыя Каленік, Лявон Халатран, Віктар Пархімчык, Анастасія Булыбенка, Натальля Карнеева і яшчэ некалькі чалавек, якія пажадалі захаваць ананімнасць.
Таксама ў падкасце прагучаць парады былых палітвязняў, былых сілавікоў і праваабаронцаў, як прайсці «Архіпелаг БЕЛАГ» з найменшымі стратамі для псіхічнага і фізічнага здароўя.
«У свеце мала ведаюць пра гуманітарную катастрофу ў Беларусі, а ўлады імкнуцца зрабіць рэпрэсіі нябачнымі, салідарнасць немагчымай, злачынствы схаванымі, галасы палітвязняў фальшывымі ці нячутнымі, – кажа аўтарка падкасту журналістка Ганна Соўсь. – Тэма палітвязняў была прыярытэтнаю для журналістаў «Радыё Свабода» ўсе гады кіравання Аляксандра Лукашэнкі. Рэжым не зможа нармалізаваць рэпрэсіі, бо расказанае, запісанае, візуалізаванае застанецца».
«Канечне, «Архіпелаг БЕЛАГ». Дакладную назву вы знайшлі, – кажа нобелеўская лаўрэатка ў галіне літаратуры і ўдзельніца падкасту Святлана Алексіевіч. – Так сёння і ёсць, але тут не такі размах, як у «Архіпелагу ГУЛАГу». Мы ж маленькая краіна.
Усе адзін аднаго ведаюць. Урэшце, у нас няма ані Магадана, ані Калымы, калі магчыма кудысьці далёка саслаць людзей і не бачыць іх. Тут яны ўсе будуць нібы на вачах. Але захаваўся дух, захаваліся спосабы катаў, захавалася іх псіхалогія, іх разуменне. І гэта ўсё Сталін, сталінскі час. Мы ніяк не можам выжыць з сябе Сталіна, і ўвогуле чалавечая прырода аказваецца нетрывалая».
Ужо даступны першы эпізод падкаста, які называецца «Затрыманне і гвалт у кабінетах ГУБАЗіКу і КДБ. Катавальня Акрэсціна». Глядзець яго можна па наступных спасылках:
https://www.svaboda.org/a/32886376.html | https://smarturl.click/dp1ez
Выходзіць падкаст «Архіпэляг БЕЛАГ» будзе штоаўторак на YouTube-канале «Радыё Свабода» www.youtube.com/@radio-svaboda і асноўных падкаст-платформах:
Раман Шавель belsat.eu
