Прадстаўнік Галоўнага ўпраўлення выведкі Мінабароны Украіны Андрэй Чэрняк заявіў, што Пуцін загадаў сваім войскам захапіць усю тэрыторыю Данецкай і Луганскай вобласцяў Украіны да сакавіка, паведамляе «Kyiv Post». Ён кажа, ужо ёсць прыкметы таго, што Расея рыхтуецца да новага захопу Данбасу.
«Мы заўважылі, што расейскія акупацыйныя войскі перакідваюць на ўсход дадатковыя дэсантава-штурмавыя групы, падраздзяленні, узбраенне і вайсковую тэхніку. Паводле звестак вайсковай выведкі Украіны, Пуцін аддаў загад да сакавіка захапіць тэрыторыі Данецкай і Луганскай вобласцяў», – сказаў Андрэй Чэрняк выданню «Kyiv Post».
Паводле ягоных словаў, Крэмль, які не здолеў захапіць Кіеў згодна з першапачатковым планам, радыкальна скараціў мэту сваёй вайны да захопу Данецкай і Луганскай вобласцяў, якія ён часткова акупаваў у 2014 годзе.
Раней дарадца кіраўніка адміністрацыі прэзідэнта Міхайла Падаляк заяўляў, што, на ягоную думку, наступ на Данбасе ўжо пачаўся і што Расея можа пачаць больш маштабныя дзеянні вясною. «Зразумела, што вясной актыўная дзейнасць будзе», – сказаў ён. «Аднак ужо сёння мы бачым такія дзеянні на Луганскім і Данецкім кірунках. То бок ідзе (расейскі) наступ».
Аднак Чэрняк сумняваецца ва ўварванні з боку Беларусі. Ён лічыць, што пакуль Расея выкарыстоўвае тэрыторыю Беларусі для рыхтавання мабілізаваных салдатаў, у яе не будзе дастаткова сілаў і сродкаў, каб распачаць масаваны наступ на Украіну з гэтага кірунку ў найбліжэйшыя тыдні.
Алена Рувіна belsat.eu