У Нарвегіі і Нямеччыне распавялі, ці дадуць дакументы беларусам, якія будуць без пашпартоў
Улады Нарвегіі і Нямеччыны паведамілі, як будуць ставіцца да беларусаў, якія не здолеюць памяняць свае пашпарты ў выніку ўказу Аляксандра Лукашэнкі.
Міністэрства юстыцыі Нарвегіі адказала мясцоваму Хельсінкскаму камітэту, што беларусы змогуць атрымліваць пашпарты замежнікаў, але кожная такая заява будзе разглядацца індывідуальна. У ведамстве адзначылі, што валодаюць інфармацыяй адносна сітуацыі ў Беларусі, але ім «цяжка адаптавацца да таго, як іншыя краіны вырашаюць рэгуляваць выдачу нацыянальных пашпартоў ці іншых дакументаў, якія сведчаць асобу, уласным грамадзянам».
Падобны адказ атрымаў і нямецкі дэпутат ад Хрысціянска-дэмакратычнага звязу Штэфан Роўэнгоф. З Міністэрства ўнутраных справаў і радзімы яму паведамілі, што для атрымання ці працягнення дакументаў, што дазваляюць знаходжанне ў Нямеччыне, у замежніка павінен быць пашпарт. Калі яго няма, адказны іміграцыйны орган будзе вырашаць «у кожным канкрэтным выпадку», ці можа быць выдадзены нямецкі дакумент, які замяняе пашпарт.
6 верасня на Нацыянальным прававым інтэрнэт-партале афіцыйна апублікавалі ўказ № 278 аб парадку выдачы дакументаў і здзяйснення дзеянняў. Дакумент уступіў у моц 7 верасня. Ён змяняе парадак ажыццяўлення адміністратыўных працэдураў, а таксама натарыяльныя дзеянні, якія маюць права ўчыняць дыпламатычныя агенты і консульскія службовыя асобы. Указ забараняе амбасадам і консульствам выдаваць пашпарты беларусам, а таксама афармляць даверанасці.
Прадстаўнік Аб’яднанага пераходнага кабінету ў замежных справах Валер Кавалеўскі адзначыў, што ўказ Лукашэнкі павысіў цікавасць партнёраў дэмакратычных сілаў да тэмы пашпарту Новай Беларусі. Паводле яго, прызнанне пашпарта Новай Беларусі спросціць жыццё не толькі беларусам, але і ўладам тых краінаў, дзе беларусы жывуць, бо людзі будуць з дакументамі, што сведчаць асобу:
«Пашпарт не толькі дапамагае развязаць практычныя праблемы, ён адмаўляе рэжыму ў магчымасці кантраляваць жыццё людзей за мяжою».
Акрамя перамоваў з партнёрамі, цяпер рыхтуецца да друку ўзору пашпарта, які можна будзе паказаць зацікаўленым бакам.
Якуб Хруст belsat.eu
