Старшыня Еўрапейскай рады Шарль Мішэль паведаміў, што ўсе краіны Еўразвязу ўхвалілі вылучэнне Украіне фінансавай дапамогі ў памеры 50 млрд еўраў.
«Гэта гарантуе сталае, доўгатэрміновае і прадказальнае фінансаванне для Украіны, – напісаў Шарль Мішэль у Х. – Еўразвяз бярэ на сябе лідарства і адказнасць за падтрыманне Украіны, мы ведаем, што пастаўлена на кон».
«Гэта добры дзень для Еўропы», – напісала ў Х старшыня Еўракамісіі Урзуля фон дэр Ляен.
Рашэнне ЕЗ аб вылучэнні фінансавай дапамогі Украіне пракаментаваў прэзідэнт Украіны Уладзімір Зяленскі.
«Працяг фінансавага падтрымання ЕЗ для Украіны ўзмоцніць нашую доўгатэрміновую эканамічную і фінансавую стабільнасць, што не менш важна, чым вайсковая дапамога і санкцыйны ціск на Расею. […] Вельмі важна, што пастанова была прынятая ўсімі 27 лідарамі», – напісаў Зяленскі ў Х.
Супраць пакету дапамогі Украіне выступаў прэм’ер-міністр Вугоршчыны Віктар Орбан. Перад самітам ЕЗ ён настойваў, што еўрапейская дапамога, разлічаная на некалькі гадоў, мусіць ухваляцца штогод і гэта мусіць быць адзінагалосная пастанова. Ён ставіў пад сумнеў ідэю Еўразвязу ўзяць на сябе абавязанні фінансаваць Украіну цягам наступных чатырох гадоў, калі, з ягоных словаў, «мы нават не ведаем, што адбудзецца праз чвэрць года».
Такое меркаванне звязваюць з адмовай ЕЗ вылучыць Вугоршчыне 20 млрд еўраў праз перасцярогі адносна правоў чалавека і карупцыі ў краіне.
Паводле Reuters, у Кіеве разлічваюць атрымаць першы транш на 4,5 млрд еўраў ад ЕЗ у сакавіку.
Марыя Міхалевіч belsat.eu