Доктар мастацтвазнаўства ў галіне ўрбаністыкі і архітэктуры Ірына Лаўроўская з Берасця сабрала за сваё вылучэнне ў склад участковай камісіі больш за дзясятак подпісаў. Аднак трапіць усё адно не здолела. Паводле чыноўнікаў з адміністрацыі Маскоўскага раёну абласнога цэнтру, праз адсутнасць досведу.
Сюрпрызаў не будзе
Прыклад з невылучэннем Ірыны далёка не адзіны. З 13-ці вылучаных прадстаўнікоў партыі «Справядлівы свет» у склад выбарчых камісіяў Берасця трапілі толькі два. А на 110 участковых выбаркамаў Маскоўскага раёну Менску месца для апазіцыі ўвогуле не знайшлося. Колькі ж агулам чалавек трапілі ў гэткія камісіі, інфармацыі на гэты конт у ЦВК пакуль не маюць.
Аднак сюрпрызаў чакаць не варта: ужо паводле першых звестак можна казаць, што фармаванне выбаркамаў прайшло гэтак жа прадказальна, як і падчас мінулых кампаніяў.
«Моцныя, падрыхтаваныя прэтэндэнты не трапляюць ва ўчастковыя камісіі. Гэта азначае толькі адное – улада мае такую нізкую папулярнасць, такую нізкую прыступку, што яна баіцца, што стане вядома, як рэальна галасуюць людзі», – зазначыў лідар Аб’яднанае грамадзянскае партыі Анатоль Лябедзька.
Усё гэта не спыняе барацьбы прадстаўнікоў дэмакратычных рухаў
Гэтак, прэтэндэнты на дэпутацкае крэсла ад кампаніі «Гавары праўду» ўжо сабралі агулам прыблізна 11 тысяч подпісаў за сваё вылучэнне. Адзін з лідараў кампаніі, Таццяна Караткевіч, назбірала іх ажно ўдвая болей, чымся патрэбна – больш за тры сотні. Наперадзе каманду «Гавары праўду» чакае чарговы этап выбарчае кампаніі – рэгістрацыя кандыдатаў і агітацыя.
Не зважаючы на малацікавую для выбарнікаў кампанію-2018, асобныя кандыдаты ўжо зрабілі шмат для таго, каб яна сталася прынамсі запамінальная. Як, напрыклад, вядомы блогер з Акцябрскага Андрэй Павук, які збіраў за сябе подпісы і адначасова развязваў праблему мясцовых дарог.
Адметна і тое, што сёлета на выбары ідзе шмат моладзі: сярод магчымых кандыдатаў – 21-гадовая выпускніца БДЭУ Наталля Навумава, беспрацоўны з Менску Міхаіл Зуевіч, адзін з кіраўнікоў руху «Дзея» Пятро Маркелаў ды старшыня каардынацыйнае рады БДУ Вольга Цесакова. Уласна мясцовыя выбары ў Беларусі пройдуць роўна праз паўтара месяца – 18-га лютага.
Віталь Бабін, «Белсат»
