Кіламетр дарогі ад Менску да вёскі Ельніца мясцовыя жыхары просяць адрамантаваць ужо дзясяты год. Аднак мясцовыя ўлады адказваюць, што гэтай дарогі няма.
Па гэтак званай нічыйнай дарозе, якая звязвае Ельніцу з менскімі Шабанамі, вяскоўцы едуць у Менск і Вялікі Трасцянец: каля кіламетру выбоінамі. Можна ехаць у аб’езд, але гэта лішнія 15 кіламетраў. І гэта вялікая праблема для жыхароў вёскі Ельніца:
«На працу, у школу ездзім гэтай дарогай – гэта цяпер нельга, а калі зімой усё ў лёдзе, дык я днішчам чапляюся».
«Можа нам наш урад зробіць зніжку, і мы трактары набудзем на трактарным заводзе і трактарамі будзем ездзіць?»
«Я, да прыкладу, еду за рулём – я гляджу толькі, каб каго не збіць – вельмі цёмна, ніводнага ліхтара. Я прасіла электрыфікаваць дарогу, зрабіць пешую частку для дзяцей. Ці мы чакаем, каб здарылася няшчасце? Я не разумею чаго мы чакаем».
Вёска Ельніца размешчаная на шляху паміж мемарыяльным комплексам Трасцянец і спартовым комплексам «Стайкі». Таму па нічыйнай дарозе праязджаюць не толькі мясцовыя жыхары, але і турысты, кажа гаспадыня мясцовай аграсядзібы.
Наталля Дудава, гаспадыня аграсядзібы «Ельніца»:
«Я сваім турыстам даю веласіпеды, і яны гэтымі веласіпедамі едуць у краму – бліжэйшы маркет. Многія едуць у мемарыяльны комплекс Трасцянец – гэта толькі гэтай дарогай. І вельмі непрыемна стаяць, уціснуўшы плечы, і тлумачыць, чаму тут ёсць добры асфальт, які раптам заканчваецца», – распавядае Наталля Дудава, уладальніца аграсядзібы «Ельніца».
Жыхары Ельніцы кажуць, што сельскі выканкам на іхны зварот адказаў, што кавалак дарогі адносіцца да Заводскага раёну сталіцы, у адміністрацыі Заводскага раёну гэта зняпраўджваюць.
«Затым мы звярнуліся ў Менскі райвыканкам, ён адказвае, што да агракамбінату «Ждановічы» адносіцца. Агракамбінат адказвае, што да іх дарога не адносіцца і ў іх такой няма», – кажа жыхар Ельніца Мікалай Карпаў.
Паразмаўлялі з чыноўнікамі пра праблему нічыйнай дарогі і журналісты «Белсату»:
«Гэтая дарога ні ў каго на балансе не знаходзіцца – гэта, як поле, напэўна. Таму мы напісалі ліст, каб яе ўзялі на баланс Гораўтадару. Гэта прымаецца рашэннем, таму ня так усё хутка. Нейкае ж рашэнне прымуць, думаю, што людзей не пакінуць», – паведаміў Алег Шчыгаль, старшыня Навадворскага сельскага выканкаму.
Пакуль улады шукаюць дарозе гаспадара, жыхары Ельніцы жартам прапаноўваюць свае шляхі развязання праблемы:
«Я бяру гэты ўчастак дарогі сабе ва ўласнасць, паколькі паводле ўсіх папераў яна нічыйная і ні ў кога на балансе не знаходзіцца – бяру на сябе баланс. Цягам месяца прымаю ўсе заўвагі, а затым стаўлю два шлагбаўмы і раблю дарогу платнай. Калі не падабаецца плаціць – абʼязджайце за 15 кіламетраў – хоць лётайце», – заяўляе Мікалай Карпаў.
Як паведаміў Мікалай Карпаў, пасля сходу жыхароў і сустрэчы з журналістамі ўлады зрабілі чарговую спробу ўпарадкаваць дарогу, але да лепшага гэткае ўпарадкаванне нічога не змяніла.
Галіна Абакунчык belsat.eu
