Кампенсацыя ці шантаж? «Гомельтранснафта Дружба» хоча павысіць кошт транзіту расейскай сыравіны

Кампенсацыя за брудную нафту ці запрашэнне да перамоваў па газе? «Гомельтранснафта Дружба» заявіла, што ад жніўня жадае павысіць аплаты за транзіт расейскай сыравіны. З якой мэтай Менск хоча павысіць тарыфы і колькі на гэтым можа зарабіць?

Плаціце за транзіт больш – патрабуе ў Масквы «Гомельтранснафта Дружба». Аператар беларускіх нафтаправодаў паінфармаваў расейскую кампанію «Транснефть», што з 1 жніўня жадае павысіць аплату амаль на 22 адсоткі.

«Плануецца падняць тарыф роўна настолькі, каб гэта кампенсавала страты ад дрэннай расейскай нафты. Менавіта такая мэта гэтага павышэння», – мяркуе Вадзім Іосуб, старэйшы аналітык «Альпары».

Гаворка ідзе пра красавіцкую аварыю, калі «Транснефть» запампавала ў нафтаправод «Дружба» каля 2 мільёнаў тонаў забруджанай хлорам сыравіны. Патрабаванні Менску з гэтай аварыяй не звязаныя – пярэчыць расейскі энергетычны аналітык Сяргей Пікін (Фонд энергетычнага развіцця, Масква):

«Яны хочуць, каб газ быў таннейшы, а калі газ не таннейшы, то давайце кампенсаваць яго кошт праз рост тарыфаў на транзіт расейскай нафты. І кожны раз ідзе гандляванне».

Новую дамову аб коштах на газ Менск і Масква планавалі падпісаць да 1 ліпеня. Аднак перамовы дагэтуль працягваюцца. І становяцца ўсё больш заблытанымі. Вадзім Іосуб, старэйшы аналітык «Альпары»:

«З ініцыятывы расейскага боку гэтыя пытанні былі звязаныя з тэмай шчыльнейшай інтэграцыі. Наўрад ці Беларусь пойдзе насустрач у гэтай інтэграцыі, таму тэма можа зацягнуцца».

256 мільёнаў долараў – столькі нашая краіна атрымала летась за транзіт расейскай нафты. Ад павышэння тарыфаў мы выйграем дадатковыя 56 мільёнаў. Гэта ў два разы менш за страты, якія паводле «Белнафтахіму» Беларусь панесла ў выніку забруджвання «Дружбы». Таму заява пра павышэнне тарыфаў можа мець не толькі эканамічныя мэты.

«Гэта нагадаць Расеі, што ў Беларусі таксама ёсць рычагі ўплыву, што вашыя нафта і газ ідуць праз беларускія трубаправоды», – тлумачыць палітолаг Валер Карбалевіч.

За транзіт тоны нафты Расея плаціць нам у два разы менш, чым Украіне, і ў тры разы менш, чым Казахстану.

Ці згодзіцца «Транснефть» плаціць Беларусі больш – абмяркоўваць рана, перакананы расейскі аналітык Сяргей Пікін. Магчыма, патрабуючы павысіць тарыфы на транзіт нафты, Менск прымушае Маскву да саступак у іншых, больш важных перамовах аб газе.

Аляксандр Папко, belsat.eu