Міжнародная група журналістаў зрабіла тое, чаго за амаль год не здолелі зрабіць улады Украіны, расследуючы забойства беларускага журналіста Паўла Шарамета. Яна знайшла новыя запісы з камераў назірання і важных сведак. Каманда ўкраінскага парталу «Slidstvo.Info» апублікавала сваё расследаванне.
Журналісты выявілі сур’ёзныя прабелы ў афіцыйным следстве. Таксама каманда атрымала доказы, якія паказваюць на магчымае дачыненне да справы галоўнай спецслужбы краіны – СБУ.
Аўтары фільму прыйшлі да высновы, што ў Кіеве побач з домам Шарамета за дзень да ягонага забойства ў момант, калі невядомыя заклалі выбухоўку, прысутнічаў як мінімум адзін працаўнік СБУ – Ігар Усціменка.
Рэакцыя СБУ з’явілася позна ўвечары пасля прэм’еры расследавання. Прэс-сакратар Алена Гітлянская праінфармавала, што Ігар Усціменка быў звольнены яшчэ ў 2014-м.
Надзвычайны непрафесіяналізм – самае мяккае, што можна сказаць пра расследаванне забойства Паўла Шарамета, – лічаць ягоныя калегі.
«Тая рэакцыя, якую апублікавала СБУ, была вытрыманая ў духу абсалютна расейскай рэакцыі. Як у Расеі звычайна кажуць «іх там няма», «яго ўжо даўно звольнілі». Нават калі гэта праўда, гэта пасля таго расследавання, якое мы бачылі, пасля такой якаснай працы журналістаў, выглядала вельмі пошла і цынічна», – мяркуе Айдэр Муждабаеў, журналіст тэлеканалу ATR.
Кіраўнік МУС Арсэн Авакаў заявіў, што на допыт выклічуць і аўтараў фільму, і Ігара Усціменку. Паводле сілавіка, шмат якія факты ў расследаванні зацікавілі ведамства. Менш чым за суткі фільм «Забойства Паўла» на «YouTube» набраў амаль 70 тысячаў праглядаў.
Пытанняў да следства шмат, кажуць калегі Шарамета з «Украінскай праўды». Яшчэ больш пытанняў, на іхную думку, спараджае незацікаўленасць СБУ ў раскрыцці гібелі журналіста і няздольнасць сфармуляваць асноўную версію.
Сваё тлумачэнне маруднасці ўкраінскіх сілавікоў ёсць у журналісткі Святланы Калінкінай, якая сябравала з Шараметам.
«Магчыма, украінскія следчыя сутыкнуліся з тым, што ў гэтым забойстве няма расейскага следу, што гэта нейкія ўкраінскія разборкі. І таму ім не надта хочацца, каб гэтая справа была раскрытая»,– мяркуе журналістка.
Праз два месяцы споўніцца год з таго моманту, як машыну Шарамета ўзарвалі ў цэнтры Кіева. Афіцыйнае следства ў гэтай справе не прасунулася, а расследаванне журналістаў, як ужо заявіла МУС Украіны, наўрад ці дапаможа даведацца, хто забіў Паўла Шарамета.