«Баімся гаварыць, быццам вы не ведаеце...» Заробкі не плацяць, а людзі маўчаць

На прадпрыемстве «Галубічы» Глыбоцкага раёну па 2–3 месяцы затрымліваюць заробкі. Людзі выжываюць як могуць, але баяцца публічна выказваць абурэнне. Падрабязнасці – у нашага карэспандэнта.

Працуем без заробку, скардзяцца працаўнікі ўнітарнага прадпрыемства «Галубічы», якое лічыцца найбуйнейшым у Глыбоцкім раёне вытворцам мяса і малака. Але гучна выказваць абурэнне людзі асцерагаюцца, бо баяцца страціць працу.

Работнікі УП «Галубічы»:

«Баімся гаварыць… Быццам вы не ведаеце. Чаго пытаецеся? Не плацяць, канечне!»

«Ну, не плацяць, гавораць. Я ў калгасе не працую. Гавораць, ужо за тры месяцы не плацяць».

«Не плацяць… У вас дазвол на здымку ёсць?»

Кіраўнік сельгаспрадпрыемства «Галубічы» Ігар Вайцяховіч прызнае, што затрымкі з заробкам здараюцца:

«Заробак ёсць. Хто хоча зарабіць, той зарабляе. І заробак выплочваецца. Бываюць затрымкі. Але як працуем, так і зарабляем».

Да ліквідацыі запазычанасці бухгалтэрыя прадпрыемства дазволіла працаўнікам у мясцовай краме браць тавары на 30 рублёў – у залік нявыплачанага заробку. Хтосьці выжывае за кошт прысядзібнай гаспадаркі, хтосьці – дзякуючы пенсіям бацькоў. Раней людзі маглі зарабіць у суседнім Падсвіллі, што месціцца за кіламетр-два ад Галубічаў. Але цяпер і там праблемы з працаю.

«Рабочых месцаў у нас няма. Цяпер такая ж самая карціна з вінзаводам. Таксама распрадаецца», – кажа жыхар Падсвілля Мар’ян Місевіч.

Мясцовы блогер Кастусь Шыталь напісаў пра гэтую сітуацыю ў Адміністрацыю прэзідэнта, бо самі людзі бараніць свае правы баяцца:

«Людзі баяцца страціць нават тую працу, якая ёсць. Пануе ў людзей такое перакананне, што кіраўніцтва ім будзе помсціць, калі яны кудысьці будуць звяртацца».

Катусь Шыталь таксама прапаноўвае захады для кардынальнага развязання праблемы:

«Патрэбныя рэформы, патрэбнае разняволенне, пашырэнне гаспадарчай ініцыятывы, прыцягненне прыватных, а можа і замежных інвестыцыяў у сельскую гаспадарку».

Актывіст мяркуе, што паўплываць на ўлады мог бы толькі страйк. Аднак выглядае, што ці то людзі яшчэ маюць запас цярплівасці, ці то такіх антыкрызісных захадаў, кшталту набыцця тавараў у залік нявыплачанага заробку, – дастаткова.

Арцём Лява, belsat.eu