Бліжэйшым часам Аляксандр Лукашэнка падпіша Закон аб народным апалчэнні. Пра гэта з пазнакаю «тэрмінова» паведамляе аб’яднанне былых сілавікоў Беларусі «ByPol». Арганізацыя ўдакладняе: узброеныя фармаванні будуць стварацца ў перыяд ваеннага становішча са звычайных жыхароў.
Глядзіце сюжэт у нашым відэа:
Сярод асноўных задачаў гэтак званых апалчэнцаў «ByPol» называе:
1. Спрыянне карным структурам Аляксандра Лукашэнкі пры забеспячэнні ваеннага становішча.
2. Атрыманне інфармацыі пра дзеянні войскаў «праціўніка» і асобаў, якія яму дапамагаюць.
Распрацоўванне гэтага закону можа быць прыкметаю падрыхтоўкі Лукашэнкі да вайны, упэўненыя ў абʼяднанні.
«Раней такога не было і раней яны не думалі пра ваеннае становішча. А цяпер яны хочуць заканадаўча зрабіць і давесці да людзей, што будзе ваеннае становішча і будзе створана гэтае народная апалчэнне», – кажа кіраўнік «ByPol» Аляксандр Азараў.
У сваю чаргу амерыканскі Інстытут вывучэння вайны ацэньвае рызыку ўдзелу Беларусі ў вайне супраць Украіны як «вельмі нізкую». Аднак прадстаўнік Абʼяднанага пераходнага кабінету ў транзіце ўлады Павел Латушка нагадвае: усё будзе залежаць ад стратэгічных планаў Крамля.
«Мы павінны з вамі разумець, што беларускі плацдарм – у стратэгічных інтарэсах Расеі. Ён ужо выкарыстоўваўся, выкарыстоўваецца і, я перакананы, на жаль, будзе выкарыстоўвацца ў інтарэсах Масквы», – распавядае Павел Латушка.
Тым часам у Менскай вайсковай камендатуры робіцца комплекс захадаў для пераводу з мірнага на ваенны час. Міністэрства абароны Беларусі заяўляе, што гэта робіцца згодна з планам раптоўных праверак узброеных сілаў краіны.
«Гэта ўзмацненне жорсткасці ўсіх тых захадаў, якія яны робяць і так у мірны час. Узмацненне жорсткасці кантролю, узмацненне кантролю за ўсімі перасоўваннямі. Выяўленне падазроных асобаў, магчымых дыверсантаў, дэзерціраў і гэтак далей».
Рыхтуюцца і ў беларускім Міністэрстве ўнутраных справаў. На даручэнне Аляксандра Лукашэнкі ў краіне стварылі новы асобы атрад спецыяльнага прызначэння – «Рысь».
«Стварэнне дадзенага падраздзялення проста прадыктавана часам на сённяшні дзень. Задача яго – забяспечыць бяспеку нашых грамадзянаў на ўсёй тэрыторыі. Неабходна будзе ўзмацненне мяжы? Гэты атрад будзе выбываць і выконваць пэўныя задачы», – кажа міністр унутраных справаў Беларусі Іван Кубракоў.
У сваю чаргу прадстаўнік Абʼяднанага пераходнага кабінету Беларусі ў справе абароны і нацыянальнай бяспекі Валерый Сахашчык заявіў, што Расея спрабуе анэксаваць Беларусь. Ён прапанаваў сакратару Савету бяспекі, генерал-лейтэнанту Аляксандру Вальфовічу правесці дыялог, каб развязаць усе пытанні, цытата, «без супрацьстаяння». На думку Сахашчыка, бліжэйшым часам рэжым Лукашэнкі можа сам пачаць шукаць варыянты перамоваў.
Руслан Ігнатовіч, «Белсат»