Паўночнаатлантычны Альянс прымаў гістарычныя рашэнні зусім блізка ад нас, і было б невыгодна для Беларусі, калі б там ніхто не прадстаўляў наш народ. Але краіны NATO запрасілі да ўдзелу ў падзеях і перамовах дэлегацыю ад дэмакратычнай Беларусі на чале са Святланай Ціханоўскай. Проста ў гэтыя хвіліны ў Вільні выступае прэзідэнт ЗША, і абраная прэзідэнтка Беларусі – сярод запрошаных на гэтую прамову.
Глядзіце сюжэт у нашым відэа:
«Байдэн, прэзідэнт ЗША ў 30 км ад мяжы з Беларуссю. І спадзяюся, што ён адчуе беларускі боль», – кажа Святлана Ціханоўская.
Тое, што прадстаўнікоў дэмакратычнай Беларусі запрасілі на спіч прэзідэнта ЗША – гэта вельмі важны знак, кажа Святлана Ціханоўская:
«Нас ведаюць, нас бачаць і нас цэняць. І што я хацела б пачуць у прамове прэзідэнта ЗША – словы аб падтрымцы Беларусі, аб тым, што трэба падтрымліваць беларусаў, якія змагаюцца супраць рэжыму, за незалежнасць і суверэнітэт Беларусі».
Упершыню абраная прэзідэнтка Беларусі сустракалася з Джо Байдэнам ажно 2 гады таму. Тады Байдэн выказаў падтрымку беларускаму народу ў барацьбе за дэмакратыю і базавыя правы чалавекам звацца.
Сёння Беларусь не стала галоўнай тэмай саміту NATO, але ўсе палітычныя сілы сочаць за тым, што адбываецца ў нас.
«Тое, што “Вагнэр” можа быць у Беларусі, – гэта кепскія навіны і для апазіцыі, бо “вагнэраўцы” вядомыя сваёй жорсткасцю і брутальнасцю, але і для Украіны – як пагроза адкрыцця другога фронту», – патлумачыў «Белсату» старшыня Мюнхенскай канферэнцыі бяспекі Крыстаф Гойсген.
Блок NATO пракаментаваў магчымы прыезд «вагнэраўцаў» у Беларусь у выніковым камюніке: гэта ўплывае на рэгіянальную стабільнасць гэтаксама як і паглыбленне вайсковай інтэграцыі з расейцамі. Паўночнаатлантычны альянс патрабуе, каб Беларусь спыніла пасобніцтва Расеі ў вайне супраць Украіны і вярнуцца да выканання міжнароднага права. NATO асуджае намер размясціць расейскую ядравую зброю ў нашай краіне. Хаця і палітыкі, і эксперты кажуць, што доказаў размяшчэння гэтых боепрыпасаў у Беларусі пакуль няма.
«Ядравыя пагрозы паказваюць, куды так званы прэзідэнт Лукашэнка прывёў краіну. Ён зрабіў Беларусь фішкай у расейскай палітычнай гульні, фішкай для Пуціна, які цяпер, не пытаючы, вызначае, ці размяшчаць там ядравую зброю», – падкрэслівае Крыстаф Гойсген.
Але гэта адбываецца насуперак волі беларускага народу, падкрэслівае Святлана Ціханоўская:
«У такіх рэчах важны пасыл, што гэта пагроза не ад Беларусі, а ад рэжыму».
Уласна навошта абраная прэзідэнтка Беларусі афіцыйна ўдзельнічае ў саміце NATO – каб нашыя суседзі працягвалі падтрымліваць беларускі народ у барацьбе за свабоду ад тыраніі. Пра гэта яна казала ў прамовах на сайд-івэнце саміту і на сустрэчы жанчын-лідарак Альянсу, у тым ліку міністарак абароны і ўкраінскай віцэ-прэм’ера. Сёння ж на палях саміту Святлана Ціханоўская абмеркавала новыя санкцыі супраць Лукашэнкі на сустрэчы з бельгійскай міністаркай замежных справаў Хаджой Ляліб. У наступным годзе Бельгія будзе старшынстваваць у Еўразвязе.
Але нагадваць саюзнікам пра незалежнасць Беларусі ўсё цяжэй.
«Незалежная Беларусь – гэта штосьці, да чаго трэба дайсці ў будучыні. Але цяпер яна страціла суверэнітэт. Калі паглядзець на сітуацыю мілітарную, на сітуацыю з санкцыямі, то мы бачым, што Беларусь – гэта пэўны працяг Расеі ў практычным сэнсе», – заявіў прэмʼер-міністр Латвіі Артурс Карыньш.
Гаспадар саміту выказаўся яшчэ больш рэзка.
«Беларусь становіцца рэальнаю праблемаю. Гэта ўжо не тая Беларусь, што была ў 2020 годзе. Не трэба ілюзіяў: гэтая краіна больш не мае незалежнасці, гэта цяпер яшчэ адна губерня Расейскай Федэрацыі», – заявіў у першы дзень саміту прэзідэнт Літвы Гітанас Наўседа.
Абʼяднаны пераходны кабінет адказаў на словы Гітанаса Наўседы:
«Аб’яднаны пераходны кабінет лічыць, што такая трактоўка стварае памылковае ўспрыманне Беларусі ў свеце і спрыяе яшчэ большай ізаляцыі нашай краіны і нашага народу. Беларусь – гэта не губерня Расеі, і беларускі народ не дазволіць ёй такой стаць».
Разам з тым Абʼяднаны пераходны кабінет вітае супольную заяву прэзідэнтаў Літвы, Латвіі і Польшчы ды генсека NATO, што ў інтарэсах Альянсу – падтрымліваць беларускі народ у барацьбе супраць дыктатуры.
Яраслаў Сцешык, «Белсат»
