Дарогі і ходнікі ператварыліся ў коўзанку, а абледзянелыя галіны падаюць на машыны. Як змагаюцца з наступствамі непагадзі?
Глядзіце сюжэт у нашым відэа:
Праз неспрыяльнае надворʼе на Берасцейшчыне без электрычнасці заставаліся амаль дзвесце паселішчаў. Прычына – мокры снег. Пад яго цяжарам абломваюцца галіны і дрэвы падаюць на дарогі, аўты, электралініі. Сярод найбольш пацярпелых раёнаў: Берасцейскі, Іванаўскі, Камянецкі, Пінскі, Драгічынскі.
Як паведамілі ў Драгічынскіх раённых электрасетках, яны ў кругласутачным рэжыме ліквідуюць наступствы непагадзі.
Прыбіраць жа снег і лёд толькі ў Берасці вывелі больш за 50 спецмашынаў. А ў Горадні гурбы расчышчалі ўсю ноч.
Сіноптыкі прагназуюць снег і галалёдзіцу бліжэйшыя дні. Кіроўцам у такіх метэаўмовах варта быць вельмі пільнымі. На слізкай дарозе аўта можа лёгка трапіць у занос.
Аўтаэксперт Сяргей Прудштэйн раіць трымаць максімальную адлегласць да папярэдняга аўта, каб пры раптоўным здарэнні была магчымасць спыніцца загадзя.
А на Раство ў Беларусь прыйдзе арктычны холад. Чакаецца да мінус 23-ох градусаў. Медыкі нагадваюць: у моцныя маразы варта апранаць паболей слаёў адзення, трымаць галаву і ногі ў цяпле ды больш рухацца.
Калі ўсё ж адбылося абмаражэнне, скура моцна пабялела ці наадварот пацямнела, траўматолаг Аляксей Носаў раіць звярнуцца да лекараў:
«Скуру не расціраць ды не займацца самалячэннем!»
А малым дзецям і асобам сталага веку медыкі раяць у моцныя маразы на вуліцу без патрэбы не выходзіць.
Дамініка Кунцэвіч, «Белсат»