Курс на айчынны відэакантэнт гэтым разам узяла тэлекампанія ОНТ. Прапагандысты знялі свой першы ігравы фільм на замову Лукашэнкі. Тым часам на «Беларусьфільме» кажуць пра недахоп сродкаў і прафесіяналаў для вытворчасці новых стужак. Што ў такім выпадку аб ’ядноўвае гэтыя ўстановы?
Глядзіце сюжэт у нашым відэа:
Дэкарацыі пастарунку і Вольга Няфёдава ў ролі сілавіка. Так выглядае тызэр камедыі пра працаўнікоў запраўкі «АЗС-1» – першага фільму, знятага праўладнай тэлекампаніяй ОНТ.
«Яны правільна робяць, што здымаюць камедыі. Вось расяяне цяпер актыўна здымаюць казкі. Бо ў такія змрочныя часы такі кантэнт і папулярны, і мае попыт…Гэты фільм таксама пазбаўлены сапраўднай рэчаіснасці, распавядае версію Беларусі, пазбаўленую палітыкі, сувязяў з нейкай сучаснасцю», – мяркуе кінажурналіст Тарас Тарналіцкі.
А пакуль ОНТ толькі пачынае сваю кінавытворчую дзейнасць, «Беларусьфільм» перажывае чарговы крызіс. Апошнім праектам студыі штучна стваралі бачнасць паспяховасці: на прэм’еры прымусова зацягвалі бюджэтнікаў і студэнтаў. Стужкі «Ліст чакання» і «На другім беразе» распавядалі гісторыі гэтак званых маленькіх людзей – доктара і партызана.
«У сучаснай моладзі ёсць патрэба на шчырасць. А тое, што робіць “Беларусьфільм”, – гэта ідэалогія. Вельмі штучная ідэалогія. І таму ў прынцыпе сама гісторыя пра маленькага чалавека – гэта добры канцэпт. Але так, як ён зроблены, гэта мінулае стагоддзе», – кажа кінажурналіст.
Палепшыць сітуацыю нібыта мусіў конкурс сцэнароў, абвешчаны напачатку года Мінкультам. У прыватнасці, улады чакалі фільмаў вайскова-патрыятычнай тэматыкі, пра герояў-спартоўцаў, працаўнікоў вёскі і «гераізм сілавікоў у жніўні 2020-га». За гэта праўладным творцам абяцалі дзве тысячы беларускіх рублёў, вядомасць і прызнанне. Вось толькі сінопсісу пра падзеі дваццатага чыноўнікі так і не атрымалі.
«Любы твор на тэму 2020 года будзе моцна кантралявацца цэнзураваннем, чысціцца Міністэрствам культуры і ўвогуле мець асаблівую ўвагу, нагляд. Ну а каму патрэбны такі стыль працы, такі гемарой? Хто хоча, каб ягоны творчы працэс на кожным этапе, кожным кроку кантраляваўся?» – адзначае кінакрытык Ірэна Кацяловіч.
Паводле праўладных кінематаграфістаў, цяпер «Беларусьфільм» выпускае максімум тры-чатыры стужкі на год, тады як «у найлепшыя часы было як мінімум сем». Такі спад творцы патлумачылі недахопам грошай, тэхнічнага абсталявання і адсутнасцю прафесійных кадраў. Апошняе, паводле нашай эксперткі, адбылося не толькі праз ідэалагічныя чысткі, але і праз няўмелую арганізацыю працоўных працэсаў.
«”Беларусьфільм” мэтанакіравана пераводзіў штатных працаўнікоў на праектную працу. Ён не змог на гэтым не згубіць. Бо ў краіне, дзе кінаіндустрыя не існуе ў прынцыпе, не можа быць так, каб прафесіянал перайшоў з адной студыі ў другую. Таму без сталага заробку яны проста ішлі ў іншыя сферы», – дадае кінакрытык.
Сярод іншага, дзеячы кіно актыўна пераходзяць на дзяржаўныя тэлеканалы. Неўзабаве прапагандысты разам з «Беларусьфільмам» плануюць наладзіць вытворчасць айчынных серыялаў.
«Здымаць серыяльныя лінейкі пад сілу любой краіне. Асабліва такой развітой, як Беларусь… У нас усё для гэтага ёсць: імкненне, жаданне, дзяржаўны падыход, засталося толькі ўвасобіць», – заявіў дырэктар тэлеканалу ОНТ Марат Маркаў.
А што да «першай кінаспробы» ОНТ – прагляд поўнага метра стужкі прайшоў у закрытым рэжыме, а вось серыяльную версію камедыі абяцаюць неўзабаве паказаць і масаваму гледачу.
Наста Печанькова, «Белсат»
