У Маскве заявілі, што ў выпадку з'яўлення ў Польшчы ядравых абʼектаў яны стануць цэллю РФ
У МЗС Расеі жорстка пракаментавалі заяву прэзідэнта Польшчы Анджэя Дуды пра гатовасць размясціць на тэрыторыі краіны амерыканскую ядравую зброю.
Намеснік міністра замежных спраў Расеі Сяргей Рабкоў заявіў, што сітуацыя з магчымым размяшчэннем ядравай зброі ЗША ў Польшчы «выклікае глыбокую заклапочанасць».
«Гэта правакацыйныя дыскусіі, спроба далейшага нагнятання напружанасці», – сказаў Рабкоў.
Намеснік міністра замежных спраў РФ заявіў, што ў цэлым «гэтая гульня вельмі небяспечная, і яе наступствы могуць быць слаба прадказальнымі». Ён таксама падкрэсліў, што «наша цярпенне не бязмежнае».
«Таму ўсе тыя палітыкі, якія цяпер па ўласных прычынах з захапленнем абмяркоўваюць у Польшчы і за яе межамі такую схему, павінны зразумець: зрухі ў гэтым напрамку бяспекі Польшчы не дададуць, а ўжо адпаведныя абʼекты дакладна стануць цэллю. І ў нашым ваенным планаванні яны будуць на пярэднім плане», – цытуе Рабкова газета «Коммерсант».
Нагадаем, прэзідэнт суседняй краіны Анджэй Дуда ў інтэрв’ю выданню «Fakt» заявіў, што Варшава даўно абмяркоўвае з Вашынгтонам размяшчэнне амерыканскай ядравай зброі ў Польшчы. Ён патлумачыў гэта тым, што Расея цяпер вельмі актыўна мілітарызуе Калінінградскую вобласць і нядаўна размясціла сваю ядравую зброю ў Беларусі. Пакуль згоды з боку ЗША няма, прызнаў польскі прэзідэнт.
Глеб Нержын belsat.eu
