Сенат ЗША плануе разгледзіць законапраект аб дапамозе Украіне, Ізраілю і Тайваню ў аўторак, 23 красавіка.
Пра гэта паведаміў лідар дэмакратычнай большасці ў верхняй палаце Кангрэса Чак Шумэр.
«Сенат гатовы зрабіць наступны крок па дадатковаму законапраекту аб нацыянальнай бяспецы», – зазначыў ён.
Раней 20 красавіка законапраект аб дапамозе Украіне, Ізраілю і Інда-Ціхаакіянскаму рэгіёну ўхваліла Палата прадстаўнікоў.
«Сенат заключыў пагадненне аб завяршэнні працы першым галасаваннем у аўторак», – паведаміў Шумэр.
Затрымак з ухваленнем законапраекту ў Сенаце не прадбачыцца, бо верхнюю палату кантралюе Дэмакратычная партыя. Пасля гэтага дакумент мусіць падпісаць прэзідэнт Джо Байдэн, які як раз і лабіяваў яго прыняцце.
У Пентагоне сцвярджаюць, што пасля прыняцця закону вайсковая дапамога можа быць перакінутая ва Украіну вельмі хутка. «Мы можам ажыццявіць перакідку на працягу некалькіх дзён», – цытуе словы прадстаўніка генерал-маёра Патрыка Райдэра The New York Times.
Глеб Нержын belsat.eu