Польскія памежнікі паведамілі пра надзвычайнае здарэнне з нерэгулярнымі мігрантамі, што мела месца ля мяжы з Беларуссю 16 красавіка.
Як паведамляецца, каля 10:30 паводле мясцовага часу польскія памежнікі ў зоне адказнасці памежнага паста ў Белавежы ўбачылі жанчыну, якой патрабавалася неадкладная медычная дапамога. Яна патлумачыла, што яна грамадзянка Эфіопіі і за некалькі гадзінаў да таго нарадзіла дачку.
Памежнікі выклікалі жанчыне ваенную хуткую дапамогу, якая неадкладна даставіла эфіопку і ейнае нованароджанае дзіця ў больніцу ў Гайнаўцы.
Станам на 15 красавіка польскія памежнікі дапамаглі 109 замежнікам, якія незаконна перасеклі польска-беларускую мяжу.
Міністарка ўнутраных справаў Літвы Агне Білатайце пракаментавала павелічэнне плыні мігрантаў, якія робяць агрэсіўныя спробы перасекчы беларуска-польскую мяжу. Паводле яе, гэта атака, якую арганізаваў беларускі рэжым.
«Была вялізная група, група з 450 чалавек, якія спрабавалі агрэсіўнымі метадамі пракрасціся на тэрыторыю Польшчы. Выглядае, што гэта не спантанны працэс. Такая вялікая група з краінаў Азіі і Афрыкі не магла сабрацца па адным. Гэта атака, арганізаваная беларускім рэжымам. Мы адсочваем гэтую сітуацыю. Падтрымліваем сталую сувязь з нашымі калегамі ў Польшчы», – сказала яна.
Са словаў міністаркі, апошнім часам на літоўска-беларускай мяжы назіраліся толькі адзінкавыя выпадкі незаконнага пераходу мяжы.
Якуб Хруст belsat.eu
