Глядзіце ў апошнім выданні праграмы:
Беларускія і польскія дыпламаты знайшлі дарогу да збліжэння
Польска-беларускія дачыненні нельга назваць узорнымі, ды і развіваюцца яны ўвесь час хвалямі, то ўздым, то перыяд зацішша. І вось адразу некалькі высокіх сустрэчаў на гэтым тыдні недвузначна намякаюць на тое, што Менск і Варшава ўвайшлі ў чарговую фазу збліжэння. З гэтае нагоды Ігар Кулей правёў інвентарызацыю двухбаковых дачыненняў.
Падтрымка саюзу з Расеяй падае, а з Еўразвязам расце. Інтэрв’ю з сацыёлагам Андрэям Вардамацкім
Чым кіруюцца беларусы, калі выбіраюць Расею і чым калі Еўрапейскі звяз? Як працоўная эміграцыя ўплывае на змены ў геапалітычнай арыентацыі? Інтэрв’ю з доктарам сацыялагічных навук Андрэям Вардамацкім.
Вучэнні «Жалезны воўк 2» на мяжы з Беларуссю. Наш рэпартаж з амерыканскай базы ў Літве
У Літве – чарговыя ваенныя вучэнні з удзелам чатырох тысяч жаўнераў НАТО. Мы з’ездзілі на базу ў мястэчку Пабрадзе, каб зняць рэпартаж пра амерыканскі батальён і паразмаўляць з ягоным камандзірам. А таксама апыталі экспертаў пра сцэнар міжнародных вучэнняў «Жалезны воўк 2» , якія пачаліся ў Літве ды якім будзе адказ беларускага кіраўніцтва, што яшчэ нядаўна нервова рэагавала на паўтысячы амерыканцаў каля нашай мяжы. Рэпартаж Дзяніса Дзюбы.
Раман Якаўлеўскі: Уладзіміра Макея могуць зрабіць ахвярным казлом
Яшчэ адным і, бадай, самым гарачым пытаннем у двухбаковых дачыненнях Беларусі і Літвы застаецца Астравецкая АЭС. І мы не маглі не звярнуць увагі на заяву Еўракамісара ў справах палітыкі суседства Ёганэса Гана, які ўжо неўзабаве пакідае свой пост. Паводле яго, пагадненне аб прыярытэтах партнёрства Еўразвяз і Беларусь падпішуць, толькі калі дасягнуць дамоўленасці наконт беларускай АЭС. Што гэта, гучная заява еўракамісара на развітанне ці перамога Вільні? Сітуацыю каментуе палітычны аглядальнік Раман Якаўлеўскі.
Чаму мільён пратэстуе ў самай багатай дзяржаве Лацінскай Амерыкі?
Перанясемся за акіян, каб прыгледзецца да сітуацыі ў самай заможнай краіне Лацінскай Амерыкі, дзе людзі бядуюць… Бядуюць шараговыя чылійцы, а таму выходзяць на мільённыя антыўрадавыя пратэсты. Насустрач ім – адмова дзейнага кіраўніка краіны пайсці ў адстаўку, вадамёты ды сапраўдныя кулі, ад якіх загінулі больш за два дзясяткі чалавек. Тысячныя арышты. Што прывяло да крызісу на лацінаамерыканскай выспе стабільнасці? Падрабязнасці ў рэпартажы Юліі Цяльпук.
Міжнародны тэлечасопіс «ПраСвет» з Алінаю Коўшык ды Сяргеем Пелясою глядзіце штотыдзень у пятніцу а 21:20. Заходзьце на Facebook праграмы! Глядзіце нас праз спадарожнік «Астра 4A» (ранейшая назва «Sirius 4»), онлайн, на YouTube-канале і на нашай старонцы.
