Правяраем прэтэндэнтаў на пасаду прэзідэнта дэтэктарам хлусні ў новым праекце праграмы «Давайце разбірацца». Выбары ці байкот? Краў ці не краў? Народны герой ці агент спецслужбаў? У часе выбарчай кампаніі палітыкі закідваюць нас лозунгамі, заклікамі ды абяцаннямі. Мы выведзем іх на чыстую ваду.
Юрый Губарэвіч першы не пабаяўся прайсці правяранне дэтэктарам хлусні. Палітык, кіраўнік руху «За свабоду», лідар апазіцыйных праймерыз адказвае на вострыя пытанні журналіста Змітра Міцкевіча. Ці падманваў ён калі-небудзь сваіх паплечнікаў? Ці верыць Губарэвіч у перамогу на прэзідэнцкіх выбарах? Ці гатовая ягоная кааліцыя прыйсці да ўлады? Палітык патлумачыць, чаму паліграф зафіксаваў хваляванне ў часе адказу на пытанне, ці мае ён рэалістычную эканамічную праграму.
Каб мінімізаваць магчымасць тэхнічнай памылкі рэакцыю спадара Юрыя ў часе правярання ацаніў кандыдат псіхалагічных навук Яўген Маліноўскі. Ці пацвердзяць жэсты і міміка палітыка ягоныя словы? Наколькі ён шчыры? Глядзіце ў відэа вышэй.
Праграму «Давайце разбірацца» глядзіце кожны чацвер а 19.05 на тэлеканале «Белсат» праз спадарожнік «Астра 4 A» (ранейшая назва «Sirius4»), онлайн або ў закладцы «Праграмы» на нашай старонцы.
