Найперш эксперты кажуць пра магчымы калапс у сістэме аховы здароўя. З праявамі гэтай праблемы сутыкнулася дырэктарка Беларускага дзіцячага госпісу Ганна Гарчакова, якая перанесла COVID-19 і лячылася ў 5-м шпіталі Менску.
«У палаце ляжаць 11 чалавек. Я пабачыла тое, чаго ніколі не чакала ў медыцыне. А менавіта – ненаданне дапамогі. Я бачыла, як людзям кепска, як яны сядзелі і плакалі, адчувалі сябе жудасна. У іх падымалася тэмпература, ім перахоплівала дыханне, не ставала кіслароду. А кіслароду ў палаце ці не было, ці гэтага аксігенатара не хапала. Я бачыла, як у чалавека падае сатурацыя, жанчына задыхалася і казала, што не дажыве да вечара. І не дажыла. Калі паднялі ў рэанімацыю, было ўжо позна», – эмацыйна выказваецца экспертка.
Ганна Гарчакова падкрэслівае, што беларуская сістэма аховы здароўя мела час, каб падрыхтавацца да эпідэміі на прыкладзе краінаў, куды эпідэмія прыйшла раней. Госця студыі як спецыялістка, якая шмат гадоў працуе ў сістэме аховы здароўя, патлумачыла, чаму Беларусь не спраўляецца з маштабамі эпідэміі ды як варта арганізоўваць меддапамогу ў такой надзвычайнай сітуацыі.
Дырэктар па даследаваннях EAST-цэнтру Андрэй Елісееў тлумачыць, чаму афіцыйная статыстыка аб COVID-19 сумнеўная. А таксама разважае пра будучыя наступствы.
«Калі не здарыцца сезоннага спаду эпідэміі, беларусам не будуць дазваляць уезд у іншыя краіны. Мы падарвем працоўную міграцыю, бізнес-кантакты», – аналізуе эксперт.
Як вядома, улады не ўводзілі каранціну, каб не падарваць эканомікі. Тым часам, на думку Андрэя Елісеева, нам пагражае замежнапалітычная небяспека. Эксперт лічыць, што, калі Расея акажацца больш паспяховай у пераадоленні эпідэміі, то Крэмль можа скарыстаць сітуацыю сабе на карысць.
У праграме выступаюць маладыя людзі, якія цяжка перанеслі COVID-19 і выжылі. Прыводзяцца гісторыі, калі ад каронавіруса раптоўна паміралі, здавалася б, здаровыя маладыя людзі.
У выданні дэманструецца сюжэт з Жодзіна – гораду, які рэдка фігуруе ў каронавіруснай хроніцы. Аказваецца, і там сітуацыя небяспечная. Сваякі загінулых распавядаюць, як страцілі сваіх блізкіх.
Што можа здарыцца ў будучыні і чаму сярэднестатыстычным беларусам нельга расслабляцца – пра гэта ў чарговым выданні ток-шоу «Кожны з нас» пра каронавірус.
Праграма «Кожны з нас» выходзіць кожную пятніцу а 18:35. Глядзіце праз спадарожнік «Астра 4A» (ранейшая назва «Sirius 4»), онлайн, на YouTube-канале «Белсат Life» і на нашай старонцы.