Нямецкая турыстка каштуе дранікі і корань лопуху. Якая страва палюбілася ёй найбольш?
Вегетарыянка Анна Штайнман з Нямеччыны прыехала ў Беларусь у гастранамічны тур і не стрымалася, каб не з’есці пальцам пханай каўбасы. А ўсё таму, што дзяўчына ўпэўненая: каб зразумець культуру краіны, трэба пакаштаваць ежу, якую ў ёй гатуюць. Чым яшчэ беларускія кухары здзіўлялі нямецкую турыстку, глядзіце ў чарговым выданні «Welcome ў Беларусь».
Кулінарныя прыгоды пачаліся ў Менску, дзе Анна разам з эксперткай у вегетарыянскіх стравах Валерыяй Пракоф’евай даследуе вулічную ежу і стравы з модных фудтракаў.
Але каб адчуць сапраўдны смак краіны, здымачная група праграмы разам з нямецкаю турысткаю выправілася на гастранамічную сядзібу побач з Белавежскаю пушчаю, каб разам з яе гаспадыняю Наталляю Пракапук прыгатаваць куліч, пальцам пханую каўбасу, дранікі ды іншыя стравы.
Наталля і Анна за шэсць гадзінаў згатавалі шчавель на галёнцы, пальцам пханую каўбасу, дранікі ды аладкі.
Каб зрабіць тварог і сыр, Анна нават паспрабавала ўпершыню ў жыцці падаіць карову.
«Я думала, што будзе складана, але гэта не так», – уразілася госця з Нямеччыны.
Для сапраўдных гаспадынь гатаванне сыру і тварагу – толькі размінка. А вось каб спячы традыцыйны каравай, Наталля Пракапук некалькі гадоў шукала ў беларускіх вёсках каравайніц, каб выпытаць іхныя сакрэты.
Даследаванне смаку Беларусі працягнулася ў Налібоцкай пушчы, дзе здымачная група праграмы «Welcome ў Беларусь» узяла ўдзел у зборы ядомых дзікіх раслінаў. Пад кіраўніцтвам біёлага Вольгі Дзюбан Анна гатавала катлеты са сніткі ды смажыла корань лопуху, які таксама прыйшоўся госці да смаку.
Падчас вандроўкі па Беларусі Анна шмат чаго пакаштавала, але якую страву з нашага краю яна будзе згадваць на сваёй радзіме? Глядзіце ў новым выданні «Welcome ў Беларусь» (відэа вышэй).
Праграма «Welcome ў Беларусь» выходзіць кожную нядзелю а 20:35. Глядзіце праз спадарожнік «Астра 4A» (ранейшая назва «Sirius 4»), онлайн, на YouTube-канале «Белсат без палітыкі» і на нашай старонцы.
