Настаўніца аднаго з трэціх класаў гомельскай гімназіі №71 парвала сваёй вучаніцы мочку вуха. Дзяўчынка патрапіла ў шпіталь, дзе ёй наклалі швы. Кіраўнік «Народнага падручніка» Сяргей Альшэўскі прычыны гэтага здарэння бачыць у сістэмным крызісе беларускай сістэмы адукацыі – між іншага, прафесійным выгаранні настаўнікаў.
Сяргей Альшэўскі кажа, што ўчынак настаўніка – супрацьпраўны, але бачыць ягоныя карані ў праблемах беларускай школьнай сістэмы.
«Я прапаную задумацца над тым: што магло прымусіць дарослага чалавека так паступіць? Гэта следства бардаку, які адбываецца ў нашай сістэме адукацыі, – кажа Альшэўскі. – Можа калі ў класе знаходзіцца больш за 35 чалавек, то клас становіцца некіравальным? Можа трэба глядзець на стан настаўнікаў, якія працуюць?».
Паводле эксперта, настаўнік павінен вучыць, а не збіраць металалом або правяраць пажарныя апавяшчальнікі.
Даследаванне прафесійнага выгарання настаўнікаў, у якім узяла ўдзел тысяча педагогаў, выявіла, што больш за палову беларускіх настаўнікаў неадэкватна рэагуюць на сітуацыю ў класе і церпяць на дэфіцыт эмоцый, бо да іх прад’яўляюць неймаверныя патрабаванні, а настаўнікі вымушаныя працаваць практычна 24 гадзіны ў суткі.
Паводле спецыяліста, кожны пяты беларускі настаўнік – пенсіянер, а дырэкцыя школаў літаральна ўпрошвае іх працаваць.
«Гэтыя людзі працуюць школе, таму што ёсць дэфіцыт кадраў, – дадае Альшэўскі. – Калі маляваць карціну абязлічанага настаўніка – гэта попел».
Размову з Сяргеем Альшэўскім глядзіце ў «Гарачым каментары»
